ABŞ-ın Harvard Universitetində aparılmış tədqiqatın nəticələrinə görə, siqaret tüstüsünə məruz qalan uşaqlarda romatoid artrit  xəstəliyinin inkişafı riski artır.

Aztibb.az xarici KİV-lərə istinadla xəbər verir ki, valideynlərin çəkdiyi siqaretin tüstüsünə məruz qalan uşaqlarda yetkinlik dövründə romatoid artrit (iltihablı revmatizm) inkişaf edə bilər.

Belə ki, Harvard Universitetinin nəzdində olan Brigham Qadın Xəstəxanasından olan mütəxəssislər uşaqlıqda valideynin çəkdiyi siqaret tüstüsünə məruz qalma ilə sonrakı yaşlarda seropozitiv romatoid artrit (RA) riski arasında birbaşa potensial əlaqənin olduğunu aşkar ediblər. Araşdırmaların nəticələri “Arthritis & Rheumatology” jurnalında dərc edilib.

Tədqiqat çərçivəsində 1989-2017-ci illər arasında 35-52 yaşlarında 90.923 qadınla aparılan sorğulardan toplanan məlumatlar istifadə edilib. Passiv siqaretçəkmə üç kateqoriyaya bölünüb: hamiləlik dövründə siqaret çəkmə, uşaqlıqda valideynlərin siqaret çəkməsi və 18 yaşından sonra siqaret çəkənlərlə keçirilmiş illər. Araşdırma uşaqlıq dövründə valideynlərin çəkdiyi siqaretin tüstüsünə məruz qalanların RA ehtimalının yüzdə 75% artdığını göstərib.