Həkim qeyd edib ki, miokard infarktında belə döş qəfəsində klassik ağrı, yanma hissi, təngnəfəslik, soyuq tər əlamətləri olmaya bilər. ABŞ kardiolaqlarının araşdırmalarına görə, infarktların 45 faizi atipik baş verir. Atipik odur ki, ya ağrısız olur, ya da ki, o qədər də miokard infarktına xarakterik olan əlamətlər olmur. Ya qolunda, dişində ağrı olur, ya da başgicəllənmə və ürəkdöyünmə ilə özünü göstərir. Vaxtında həkimə müraciət edilmədikdə daha çox ağırlaşma olur.

 

Onun sözlərinə görə, səyirici aritmiyası olan xəstələrin yarısına qədəri bəzən bilmirlər ki, onlarda bu xəstəlik uzun illər olub. İnsult xəstələrinin üçdə birinin səbəbi ürək mənşəlidir. Bu da əsasən səyirici aritmiya səbəbindən baş verir. Belə xəstələrin 30 faizi insultla xəstəxanaya düşəndə bilirlər ki, onlarda səyirici aritmiya var imiş:

 

"Anadangəlmə, qazanılmış ürək qüsurları illərlə heç bir şikayət yaratmaya bilər. Uzun müddətdən sonra xəstələrdə təngnəfəslik, ödemlər, tez yorulma kimi əlamətlərlə özünü göstərə bilər ki, artıq bu mərhələdə xəstədə ürək çatışmazlığı inkişaf edir, ürək kameralarında böyümə gedir, yəni gecikmiş bir mərhələ olur.

 

Heç bir şikayətiniz olmasa belə, vaxtaşırı həkimə müraciət etmək, bir problem varsa, vaxtında bunları aşkarlamaq lazımdır. Xüsusilə diabet xəstələri, yüksək təzyiqdən və artıq çəkidən əziyyət çəkən insanlar rutin müayinələri axsatmamalıdırlar".