Qarpızın qabığı özü qədər faydalıdır. Qarpız qabığındakı ağ maddə dişləri ağardır və parlaq edir, qurdları tökür. O, həm də böyrəkləri və öd kisəsini kiçik ölçülü qumlardan təmizləmək üçün mükəmməl vasitədir. Qarpız qabığı suyu həm ödqovucu, həm də sidikqovucudur. Qarpız qabığını müalicə məqsədilə istifadə etmək üçün qalın qabıq qarpız götürüb üstündəki tam yaşıl hissəni soyub altındakı ağ maddəni qurudub bütün il boyu istifadə edə bilərsiniz.

Aztibb.az xəbər verir ki, bu barədə həkim-fitoterapevt Fizuli Hüseynov məlumat verib. 

Bildirib ki, qurudulmuş qarpız qabıqlarından 2 xörək qaşığı götürüb 3 stəkan suda 10 dəqiqə vam odda qaynadıb, sonra süzüb gündə 3 dəfə yeməkdən 30 dəqiqə əvvəl 1 stəkan içmək faydalıdır. Müalicənin müddəti 1 aydır.

"Qarpız yeyilən vaxtlarda da bu müalicədən faydalana bilərsiniz. Belə ki, qalın qabıqlı qarpızların üst yaşıl hissəsini soyub altında qalan ağ maddəni sürtkəçdən keçirib salatlara qarışdırıb yeyə bilərsiniz", - deyə həkim vurğulayıb. 

Onun sözlərinə görə, qarpız qabığında üz dərisini təravətləndirici maddələr var: "Qarpız qabıqlarını blenderdən keçirib üzə çəkib 20-30 dəqiqə saxladıqdan sonra yumaq lazımdır. Qarpız qabığındakı amin turşular həm kişilərdə, həm də qadınlarda cinsi istəyi gücləndirir. Qarpız qabığındakı zəngin liflər bağırsaq tənbəliyində, qəbizlikdə çox faydalıdır. Babasildən əziyyət çəkənlər qarpız qabığının dəmləməsindən faydalana bilər. Qarpız qabığındakı antioksidantlar (likopen) xərçəng xəstəliyinin müalicə və profilaktikası üçün faydalıdır".