İcbari Tibbi Sığorta üzrə Dövlət Agentliyinin Maliyyə departamenti tərəfindən Gəncə şəhərində ölkənin bir sıra tibb müəssisələrinin maliyyə, sığorta, insan resursları və digər inzibati, idarəetmə sahələri üzrə çalışan əməkdaşlar üçün maliyyə hesabatları və mühasibatlığa dair təlimlər keçirilib.

Aztibb.az xəbər verir ki, Gəncə Birləşmiş Şəhər Xəstəxanasında təşkil olunan “İcbari tibbi sığorta əlavəsi və bonusların hesablanma qaydası” və “İllik maliyyə hesabatlarının tərtib olunması qaydası” adlı təlimlərə Gəncə Şəhər Birləşmiş Xəstəxanası, Samux, Göygöl, Goranboy, Şəmkir, Daşkəsən, Gədəbəy, Kəlbəcər, Xocalı, Ağstafa, Qazax və Tovuz rayon mərkəzi xəstəxanalarının və Qazax, Tovuz müalicə-diaqnostika mərkəzlərinin müvafiq işçi heyəti cəlb olunub.

Təlimlərin keçirilməsində məqsəd regionlarda icbari tibbi sığortanın tətbiq olunduğu xəstəxanaların əməkdaşlarına icbari tibbi sığorta əlavəsi, bonusların hesablanma qaydası və illik maliyyə hesabatlarının tərtib olunmasına dair təlimatın verilməsini həyata keçirməkdir.

Qeyd edək ki, “İcbari tibbi sığorta əlavəsi və bonusların hesablanma qaydası” adlı birinci təlimdə Agentliyin Maliyyə departamentinin məsul əməkdaşları Yadigar Mahmudzadə və Fidan Əliyeva “Tibbi Ərazi Bölmələrini İdarəetmə Birliyi” publik hüquqi şəxsin tabeliyindəki tibb müəssisələrində çalışan səhiyyə işçilərinin əməyinin ödənilməsi sistemi haqqında” Qaydanın tətbiqinə dair təqdimatla çıxış ediblər. Təlimdə iştirakçılara Qaydaya edilən dəyişikliklər, sabit həvəsləndirici və işin nəticələrinə görə aylıq həvəsləndirici əlavələrin hesablanması barəsində geniş məlumat verilib.

Daha sonra isə “İllik maliyyə hesabatlarının tərtib olunması qaydası” adlı növbəti təlimdə Agentliyin digər əməkdaşları mühasibat uçotunun və maliyyə hesabatlarının beynəlxalq standartlara uyğun aparılması qaydaları, həmçinin mühasibatlıq biliklərinə dair təqdimatı iştirakçıların diqqətinə çatdırıblar.

Hər iki təlimin sonunda Agentlik əməkdaşları tərəfindən tədbir iştirakçılarının sualları ətraflı şəkildə cavablandırılıb.

Nəzərə çatdıraq ki, sözügedən təlimlər avqustun 10-da Şəki, Zaqatala, Balakən, Qax, Oğuz və Qəbələ rayon mərkəzi xəstəxanalarının və Zaqatala, Qəbələ müalicə-diaqnostika mərkəzlərinin əməkdaşlarının iştirakı ilə Şəki rayonunda, avqustun 11-də isə Mingəçevir Şəhər Mərkəzi Xəstəxanası, Naftalan, Ağdaş, Yevlax, Göyçay və Ucar rayon mərkəzi xəstəxanalarının əməkdaşlarının iştirakı ilə Mingəçevir şəhərində keçirilib. Eyni zamanda, Agentlik tərəfindən növbəti mərhələdə bu tədbirlərin Bakı, Sumqayıt şəhərləri və Abşeron rayonu daxil olmaqla ölkənin bir sıra bölgələrində təşkil olunması planlaşdırılır.

Agentlik gələcəkdə də icbari tibbi sığortanın tətbiq olunduğu tibb müəssisələrinin maliyyə sahəsi üzrə əməkdaşlarının peşəkarlığının artırılması məqsədilə silsilə tədbirlərini davam etdirəcək.