İsti yay günlərini yaşayırıq. İstivurma, günvurma kimi təhlükəli hallardan özümüzü qoruya bilirik. Amma həddən çox tərləmə və bununla da çox miqdarda mineral duzların, suyun itirilməsi orqanizmi yorğun və halsız edir.

Aztibb.az xəbər verir ki, həkim-pediatr Aytən İsmayılzadənin sözlərinə görə, bədənimizdə olan bütün biokimyəvi proseslər üçün su və minerallar lazımdır. Onlar azaldıqda maddələr mübadiləsi, orqanların işi zəifləyir, əzələ tonusu azalır, düşünmə prosesi belə ləngiyir. Çünki beyində neyronlararası əlaqələr də ionlar vasitəsilə baş tutur. Uzun müddət çoxlu tərləmə və bunun üçün qabaqlayıcı tədbirlərin görülməməsi nəticəsində ürəyin gücü azalır, böyrəklərin işi çətinləşir, bağırsaqların hərəkətliyi pozulur, baş ağrıları, halsızlıq, yorğunluq olur.

Həkim qeyd edib ki, bu kimi hallar uşaqlara da aiddir və onlarda özünü daha tez göstərir. Uşaqlarda iştahsızlıq, ağlağanlıq, yuxu narahatlığı, qəbizlik əlamətləri görülür. Düzdür, tərləmə şlakların, toksinlərin bədəndən çıxma yolu olsa da, bu zaman itirilən duzları və suyu yerinə qoymaq lazımdır. Bunun üçün yay aylarında isti çay içib bir az da tərləmək kimi adətimizi bir kənara qoysaq yaxşı olar. Gun ərzində uşaqlara da, özünüzə də müxtəlif morslar, kompotlar təklif edin. Sulu meyvələr, qarpız, təbii minerallı sular yaxşı seçimdir:

"Moruq, böyurtkən, qırmızı qarağat, qara qarağatdan hazırlanmış morslar hər kəs üçün əla mineral mənbəyidir. Onların əzməsini, püresini dondurucuda saxlayıb mütəmadi olaraq su ilə qarışdırıb mors kimi uşaqlara verin. Yəni onları sadəcə qış vaxtı qrip olanda çay ilə içmək üçün saxlamayın. Giləmeyvələrin tərkibində A, E, B qrupu, C vitamini bol miqdarda olur. Dondurulma zamanı vitaminlər də saxlanılır. Bundan başqa, manqan, fosfor, dəmir, maqnezium, kalsium var. Bu meyvələr həm də təbii fitonsid olaraq virus infeksiyaları ilə mubarizədə kömək edəcək. Ərik, şaftalı, gavalının tərkibində çox miqdarda antioksidant, kalium, fosfor və vitaminlər var. Onları alıb sadəcə mürəbbə və kompot kimi ölü ərzaq şəklində qışa saxlamayın. Mütləq zamanında, uşaqların ehtiyacının çox olduğu vaxtda istifadə edin. Püre şəklində buzxanada saxlayın. Beləliklə, onların vitaminləri də qorunub qalacaq. Buz kubları şəklində suya salıb uşaqlara həm də əyləncəli formada təklif edə bilərsiniz".