“Ana südü bu dünyada qida olaraq ən vacib nemətdir”.
Aztibb.az-ın məlumatına görə, bunu Səhiyyə Nazirliyinin “Instagram” səhifəsindəki canlı yayımda Baş pediatr Erkin Rəhimov bildirib.
Onun sözünə görə, uşaq doğulandan ilk 30 dəqiqə, 1 saat ərzində ana südü qəbul etməlidir: “Çünki bu vaxtda uşaq aktiv olur, 1-2 saat sonra isə uşaqda yuxululuq yaranır. İlk gələn süd ən vacib olan, infeksiyadan qoruyan “ağız südü” deyilən süddür. Ona görə də uşaq dünyaya gələn kimi dərhal, ilk yarım saatda süd qəbul edilməlidir”.
Baş pediatr bildirib ki, uşaq bəzən keysəriyyə ilə doğulur. Keysəriyyə tam anesteziya ilə də olur, spinal anesteziya ilə də. Bu zaman ana özündə olur, anlaqlı olur. Burada ana südünün qəbulu üçün kritik vaxt 2 saatdır, bu müddətdə uşaq ana südü qəbul etməlidir.
E. Rəhimov deyib ki, keysəriyyə ilə doğulan uşaq daha gec ana südü qəbul etməyə qoyulur, ona görə də süd gec gəlir: “Ümumdünya, səhiyyə təşkilatı və bütün rəsmi qurumların tövsiyəsi budur ki, körpə 6 ay ancaq süd qəbul etməlidir, su belə qəbul etməməlidir. 6 aydan sonra əlavə qida qəbul edilə bilər, amma ana südü davam etməlidir".
Onun sözlərinə görə, 2 yaşa qədər uşaq ana südü qəbul etməlidir, amma 1 yaşla 2 yaş arasında ana südü daha çox immunitet baxımından faydalıdır, bu zaman uşaq üçün əsas qida da verilməlidir: "Ana südünün verilməməsi üçün əks göstərişlər çox azdır. Bəzi mübadilə xəstəliklər zamanı verilməməlidir. Uşaqlarda qalaktoza xəstəliyi, eyni zamanda, anada bəzi virus infeksiyaları zamanı, xüsusilə də AİDS zamanı süd vermək olmaz. Hepatit B və Hepatit C ilə bağlı ehtimal azdır, ona görə də uşağa həm peyvənd, həm də immuqlabin vurulubsa ana südü verə bilər”.