Osteoxondroz onurğa sütununda olan xroniki distrofik prosesdir.

Aztibb.az xəbər verir ki, tanınmış reabilitoloq, fizioterapevt, idman zədələri üzrə mütəxəssis, osteopat Pərvin Əkbərov bu barədə məlumat verib.

Həkimin sözlərinə görə, hazırda osteoxondroz tibb elmində çox ciddi problem kimi qəbul olunur. Osteoxondroz cavan və orta yaşlı insanlarda inkişaf edir, müxtəlif pozulmalara, iş qabiliyyətinin azalmasına, hətta şikəstliyə gətirib çıxarır.

Statistikaya görə, damar problemlərindən (hipertoniya, ateroskleroz, ürəyin işemik xəstəliyi, infarkt və insult) sonra osteoxondroz xəstəliklər arasında 2-ci yer tutur. Lakin damar xəstəliklərindən fərqli olaraq osteoxondroz cavan insanlarda inkişaf edir. Bunun səbəbini isə həkimlər müasir insanın azhərəkətli həyat tərzində, düzgün olmayan qidalanmada görürlər. Müasir insanın həyatı gündən-günə avtomatlaşdırılır. Müasir həyat tərzi daha hərəkətsizdir - məişətdə paltaryuyan, qabyuyan maşınlar istifadə olunur. İnternet vasitəsilə evdən çıxmadan insan hər bir şey əldə edə bilir və s. Bütün bu rahatlıqlar isə insanı daha zəif edir.

Boyun osteoxondrozu zamanı bu kimi simptomlar meydana çıxa bilər:

- boyun hissəsində daim ağrılar;

- qollarda və çiyinlərdə ağrılar, keyləşmə, “qarışqaların gəzişməsi” hissi;

- boyunun hərəkətliliyinin məhdudlaşması. Bəzən insan hiss edir ki, boynunu tərpədə bilmir və başını yanlara çevirmək üçün bədənini çevirməli olur;

- baş gicəllənməsi;

- başda ağırlıq hissi;

- tez-tez təkrarlanan baş ağrıları;

- ənsə nahiyəsində ağrı;

- qulaqlarda küy;

- daim yorğunluq hissi;

- görmə və eşitmənin pisləşməsi;

- yuxusuzluq.