Parkinson xəstəliyi alzheymer xəstəliyindən sonra ən cox rast gəlinən degenerativ xəstəlikdir. Fizioterapiya və reabilitasiya üsulu bu xəstəliyin əsas müalicə proqramıdır.

Aztibb.az xəbər verir ki, tanınmış reabilitoloq, fizioterapevt, idman zədələri üzrə mütəxəssis, osteopat Pərvin Əkbərov bu barədə məlumat verib.

Həkimin sözlərinə görə, parkinson xəstələrinə nizamlı şəkildə məşqlər təklif edilir. Həmçinin ağrı, səhər saatlarında yuxululuq, mədə-bağırsaq fəaliyyətində yavaşlama, yuxu davranış pozuntusu, qəbizlik, depressiya və digər parkinson xəstəliyinin qeyri-motor simptomlarının reabilitasiyasına yönəlik terapiyalar tətbiq olunmalıdır.

Parkinson xəstəliyində dərman müalicəsinə əlavə olaraq xəstələrin gündəlik həyatlarında daha müstəqil və rahat olması, xəstəlik əlamətlərinin aradan qaldırılması və ya ən azından inkişafının qarşısının alınması üçün fizioterapiya proqramı verilir. İstifadə edilən başlıca müalicə üsulları hidroterapiya, bimanual müalicə, elektroterapiya kimi təməl fizioterapiya texnikalarıdır.

Bundan əlavə, hər xəstəyə məşq proqramı hazırlanır və bu proqram xəstənin həyatını asanlaşdırmaq üçün vacibdir. Təlim proqramına uyğunlaşmaqla xəstələr ikincili ağırlaşmalardan qurtula bilirlər.

"Reabilitasiyanın əsas hədəfi dayaq-hərəkət pozğunluğunun korreksiyası və məcburi hipodinamikanın arzuolunmaz nəticələrinin qarşısının alınmasıdır", -deyə, həkim əlavə edib.