"Böyrək nəqlindən sonra böyrəyini bağışlayan donorda gələcəkdə böyrək çatışmazlığının yaranma riskinin məhz bu səbəbdən artmasın ehtimalı yoxdur".
Aztibb.az xəbər verir ki, bu barədə nefroloq Barat Yusubov sosial şəbəkədə məlumat verib.
Həkimin sözlərinə görə, bu günə qədər Amerikada 75 min insan yaxınlarına böyrək bağışlayıb. Amerika və Avropada bugünə qədər aparılan statistik araşdırmalara görə, heç bir böyrək donoru olan insanda böyrək çatışmazlığı əmələ gəlmə riskinin artması qeydə alınmayıb.
B.Yusubov qeyd edib ki, Amerika və Avropada canlıdan orqan nəqlinin artması üçün yaxınlarına böyrək bağışlanması işinə orqan bağışı müəssələri və dövlət qurumları tərəfindən dəstək verilir. Cəmiyyət içində minlərlə insan tək böyrəklə anadan olur və bu insanlar sağlam həyat yaşayırlar.
"Bəzi böyrək xəstəlikləri və ya qəzalar nəticəsində də insanların bir böyrəyin götürülməsi lazım ola bilər. Bu hallarda həmin insanların böyrək çatışmazlığı olma riski normal insanlardan fərqli deyil. Bir çox xəstəliklər hər iki böyrəkdə eyni zamanda başlayır. Yəni hər hansı bir şəxsdə böyrək çatışmazlığının inkişafı onun iki böyrəkli olması və ya tək böyrəkli olmasına bağlı deyil. Əksinə əgər bir zaman böyrək çatışmazlığı kimi bir xəstəliklə üzləşmə riskiniz varsa ,ən azından bir böyrəyinizi donor olaraq yaxınınıza verib onun sağalmasına səbəb ola bilərsiniz", - deyə həkim vurğulayıb.