Qohum evlillikləri genetik ötürülən bir sıra xəstəliklərin epidemiyasına səbəb olur. Genetik xəstəliklər arasında, əsasən, autosom-resessiv ötürülən xəstəliklərin uşaqlarda görülmə riski artır.

Aztibb.az xəbər verir ki, həkim-pediatr Günay Rəsulova qohum evliliklərindən doğulan uşaqlarda rast gəlinə biləcək xəstəliklər haqqında danışıb.

O bildirib ki, qohum evlilikləri ilə doğulan uşaqlarda əqli gerilik, korluq, karlıq riski də artır. Ciddi əqli gerilik qohum evlilikləri ilə ona görə əlaqəlidir ki, autosom-ressesiv ötürülən bir çox xəstəliklərdə yüngül əqli gerilik vardır. 1-ci dərəcə qohum evliliklərində uşaqların anadangəlmə qüsurlarla doğulması riski normal populyasiyadan 2 dəfə çoxdur (4-6 %, normal populyasiyada isə 2%). Birinci dərəcə qohum evliliklərində, ölüdoğulma və körpə ölümü riski də vardır. Bundan başqa bu uşaqların 4-6%-nin doğum defektləri ilə doğulma riskini nəzərə almaq lazımdır.

Həkim israrla qohumla evlənməyi planlaşdıran cütlüklərə məsləhətlərini də verib.

- Ən sıx rast gəlinən genetik xəstəliklərə görə müayinələrdən keçilməlidir.

- Hamiləlik USM və üçlü test ilə izlənilməlidir.

- Yeni doğulan körpədə topuq testi və hətta genişləndirilmiş metobolik tarama testi edilməlidir.

- Körpə doğulduqdan sonra inkişaf yönündən dəyərləndirilməli, ikinci bir hamiləlik üçün ən az 3-4 il gözlənilməlidir.

“Adını belə tələffüz edə bilmədiyiniz xəstəliklərin həyatınızın bir parçasına çevrilməsini istəmirsinizsə, qohum evliliyi etməyin”, - deyə G.Rəsulova çağırış edib.