Mircəlal Kazımi: "Hepatit xəstəliyi tam müalicə olunan xəstəlikdir" - VİDEO
31.07.2021 11:23
Hazırda dünyada 500 milyon insan hepatit viruslarından əziyyət çəkir. Onlardan hər il 1,5 milyon nəfəri dünyasını dəyişir. Əslində hepatit xəstəliyi tam müalicə olunan xəstəlik sayılır. Təəssüflər olsun ki, hepatit B və hepatit C viruslarına yoluxduqdan sonra bu xəstəlik təxminən 15-20 ildən sonra özünü büruzə verir. Amma artıq gec olur və xəstə onun fəsadlarını yaşayır. Orqanizmdə resursların tükənməsi prosesi gedir, nəhayətdə qaraciyər sirrozu və qaraciyər xərçənginə səbəb ola bilir.
 
Aztibb.az xəbər verir ki, regionda orqan transplantasiyası əməliyyatlarına ilk imza atanlardan biri – Mərkəzi Gömrük Hospitalının Cərrahiyyə və orqan transplantasiyası şöbəsinin rəisi, ümumi cərrah, cərrah-transplantoloq Mircəlal Kazımi ATV Səhər proqramına müsahibəsində hepatit xəstəliyinin müalicəsindən, onun vaxtında aşkarlanmasının əhəmiyyətindən və qorunma yollarından danışıb.
 
Həkim bildirib ki, müalicənin heç bir üsulu yaramadıqda, qaraciyər transplantasiyası əməliyyatı xəstənin həyatda qalması üçün son şansa çevrilir. Bu əməliyyat Cənubi Qafqazda, Orta Asiyada ilk olaraq Azərbaycanda (12 dekabr 2008-ci il) həyata keçirilib. Hazırda ölkəmizdə yüksəkixtisaslı, peşəkar həkimlər komandası fəaliyyət göstərir və onlar tərəfindən icra edilən transplantasiya əməliyyatlarının sayı 1500-ü keçib.