Yaddaşı gücləndirmək üçün nə etməliyik və hafizəmiz hansı səbəblərdən zəifləyir, diqqətimiz azalır?

Aztibb.az xəbər verir ki, həkim-fitoterapevt Fizuli Hüseynov bu halların qarşısını almaq üçün bir neçə məsləhət təqdim edib:

- Qanda hemoqlobin səviyyəsini yoxlatmaq yaxşı olar, çünki qanazlığında belə hallar ola bilər. Əgər anemiya varsa, 10 ədəd limonun şirəsini, 1 kiloqram çuğunduru 1 kiloqram balın içinə kağız kimi nazik doğrayıb qarışdırın. 1 həftəsoyuducuda gözləyin, gündə 1 dəfə qarışdırın, sonra süzün, gündə 3 dəfə yeməkdən əvvəl 2 xörək qaşığı için.

- Həddən artıq yemək beyinə axan qanın azalmasına səbəb olur, buna görə acmamış yeməyin, doymamış süfrədən durun. Həftədə 2 dəfə oruc tutulması beynin qidalanmasını yaxşılaşdırır.

- Gündə 2 stəkan kök şirəsi yaddaşı inanılmaz dərəcədə gücləndirir.

- Başdan hicama yaddaşsızlıq və diqqət zəifliyi üçün möhtəşəm bir vasitədir, eyni zamanda baş ağrılarını götürür, görməni yaxşılaşdırır, əzbərləmə qabiliyyətini gücləndirir.

- Gündə 2 dəfə 1 xörək qaşığı balı 1 stəkan çiy suya qarışdırıb şərbət halında içə bilərsiniz.

Həkim, həmçinin Həzrəti Əlidən resept təqdim edib. Onun sözlərinə görə, 1 qram zəfəran 4 yerə bölünür, bölünmüş hissədən bir hissə götürüb yarım stəkan isti suda qarışdırılıb 12 saat gözlənilir, sonra stəkan tam dolana qədər süd əlavə edilir, səhər yuxudan duran kimi məhlul içilir və zəfəranlar yeyilir. İçəndən ən azı yarım saat sonra yemək yeyilməlidir.

Yaddaş məcunu:

Zəncəfil tozu – 40 qram;

Qinko Biloba yarpağı tozu – 40 qram;

Çiçək tozu – 40 qram;

Yapon saforası çiçəyi tozu – 40 qram;

Jenşen kökü tozu – 40 qram;

Bal – 1 kq.

F.Hüseynov qeyd edib ki, imtahana hazırlaşan yeniyetmələr üçün çox faydalı olan yaddaş məcununda bitkilər qurudulmuş olmalı, toz formasına salınmalı və bal ilə yaxşı-yaxşı qarışdırılmalıdır. Böyüklər gündə 3 dəfə yeməkdən əvvəl 1 çay qaşığı, uşaqlar yarım çay qaşığı qəbul etməlidir.