19 yaşlı azərbaycanlı tələbə Mədinə Şərifova Birləşmiş Krallığın Belfast şəhərində yerləşən, dünyanın nüfuzlu universitetlərindən biri olan Queen’s Universitetinin biotibb elmləri bölməsindən birinci dərəcəli Fəxri Fərmanla məzun olub.

M.Şərifova təhsil almaq üçün Birləşmiş Krallığa yollandığı zaman cəmi 16 yaşında olub.

Aztibb.az bu barədə Queen’s Universitetinin məlumatına istinadla xəbər verir.

Məlumatda bildirilir ki, gənc yaşda yeni bir ölkəyə köçmək bir qədər qorxulu olsa da, M.Şərifova bütün bu çətinliklərin öhdəsindən gəlib. O, həm universitet dərslərində yüksək akademik nəticələr göstərib, həm də dərsdən kənar fəaliyyətinə görə bir neçə mükafata layiq görülüb.

M.Şərifova biotibb tələbələri arasında ən yüksək bal toplayaraq “Birinci il beynəlxalq tələbə təqaüdü”nü qazanıb və bu imkandan doğru şəkildə yararlanaraq təhsilini birinci dərəcəli Fəxri Fərmanla bitirməyə nail olub.

Azərbaycanlı tələbə bu təqaüdü qazandığını öyrənəndə çox təəccübləndiyini bildirib: “Universitetdə dünyanın bir çox ölkələrindən olan tələbələrlə tanış oldum və Belfastın "evdən uzaq evim" olduğunu hiss etdim. Təhsilimin ilk ilinin sonunda təqaüd qazandığımı eşidəndə çox təəccübləndim”.

O, təhsili ilə yanaşı digər insanlara dəstək olmaq üçün də vaxt tapıb. Bu yaxınlarda “SU Awards”da (Tələbə Birliyinin Mükafatlandırma Mərasimi) "Birlikdə oxu" proqramı üzrə könüllü fəaliyyəti ilə mükafat qazanıb. Bu proqram 7-10 yaşlarında olan uşaqlara savadlılıq bacarıqlarını inkişaf etdirmələrinə kömək etmək üçün təlim keçmiş Tələbə Mentorları bir araya gətirir.

M.Şərifova fəaliyyəti ilə bu mükafata layiq görülməsinin onun üçün şərəf olduğunu bildirib:

“Bu proqramda iştirak etməyi çox sevirdim. Xüsusi ilə hər həftə uşaqlarla bir araya gələrək onlara hekayələr oxumaqdan zövq alırdım. Əsl mükafat uşaqların həyatında bir dəyişiklik edə bilmək idi və bu ilki mükafat ilə bu fəaliyyətimizə olan bağlılığımıza görə tanınmağımız bir şərəfdir.”

M.Şərifova məzun olduqdan sonra İngiltərədə bir laboratoriyada işə başlayacağına ümid etdiyini bildirib.