Valokordin və korvalol adətən ürəkdə narahatlıq, ağrı hissi zamanı istifadə olunur. Bu dərmanlar əhali arasında çox populyardır və apteklərdə reseptsiz satılır. Lakin həkimlər xəbərdarlıq edirlər ki, bu 2 dərman heç də ziyansız deyil.

Aztibb.az tibbi mənbələrə istinadən bildirir ki, nə valokordin, nə də korvalol ürək-damar sistemi xəstəliklərinin müalicə və profilaktikasında heç bir yardım etmir. Bu səbəbdən həkimlər ürəkdə hər hansı narahatlıq, ağrı olduqda bu dərmanlardan istifadə etməyi tövsiyə etmirlər. Çünki bu, vaxt itkisinə və xəstənin vəziyyətinin daha da ağırlaşmasına səbəb ola bilər.  

Valokordin və korvalol əsasən yuxusuzluqdan əziyyət çəkənlərə yardım edə bilər. Bunun əsas səbəbi preparatların tərkibində olan narkotik maddə fenobarbitaldır. Fenobarbital tez bir zamanda asılılıq yaradır. Beləliklə, insana “effekt almaq” üçün getdikcə daha böyük dozalar tələb olunur. Bu isə çox təhlükəlidir.

Ekspertlər xəbərdarlıq edir ki, müntəzəm olaraq istifadə olunduğu halda valokordin və korvalol sinir sistemi, nəzfəsalmanın pozulması və hətta komaya səbəb ola bilər.  Avropa ölkələrində bu preparatlar uzun müddətdir ki, istifadə olunmur. Bütün bunları nəzərə alaraq mütəxəssislər insanları bu preparatların özbaşına qəbulundan çəkinməyə çağırır.