Cərrah-transplantoloq, tibb üzrə fəlsəfə doktoru Mircəlal Kazıminin rəhbərliyi ilə Hepatit C-yə (HCV) bağlı qaraciyər sirrozu və qaraciyər xərçəngi (HCC) olan 62 yaşlı xəstədə qaraciyər rezeksiyası həyata keçirilib.

 

Həkim qeyd edib ki, HCV xəstəliyi əksər hallarda fəsadlaşana qədər səssiz seyr edir. Buna görə də, erkən mərhələdə təyin etmək mümkün olmur.  Xəstəliyin demək olar ki, əlamətləri olmur və yaxud halsızlıq, ümumi zəiflik, həzmsizlik kimi əhəmiyyət verilməyən əlamətlərlə özünü büruzə verir. O, insandan insana qan yolu ilə yoluxur. Yoluxanların təqribən 25-30%-də tam sağalma mümkün olsa da, 70-75% hallarda xroniki xəstəliyə çevrilir. Son illərdə HCV-nin müalicəsində inqilabi yeniliklər olmasına baxmayaraq, bu virus xüsusilə ölkəmizdə də öz aktuallığını qoruyur.

 

M.Kazımi HCV-nin əsas fəsadları barədə məlumat verərək qeyd edib ki, xəstəlik qaraciyər sirrozu, HCC, eləcə də qaraciyər sirrozu və xərçənginin eyni zamanda yaranması kimi ağırlaşmalara səbəb olur. O, əlavə edib ki, hər mərhələnin özünəməxsus müalicə metodu mövcuddur. 

 

M.Kazıminin sözlərinə görə, qaraciyər rezeksiyası kimi əməliyyatlar xüsusilə qaraciyər sirrozu olan xəstələrdə ciddi təcrübə və biliyə malik olan komandalar tərəfindən icra olunmalıdır:

 

"Əməliyyatdan sonra qaraciyər yetməzliyi, qaraciyər koması kimi fəsadlar hər an baş verə bilər və buna hazır olmaq lazımdır. Komandamızla xəstəyə sağ tərəfli qaraciyər rezeksiyası icra etdik. Əməliyyatdan sonrakı dövr fəsadsız keçdi. Histoloji olaraq HCC, cərrahi sərhədlər təmiz, damar invaziyasına rast gəlinmədi. Xəstə müvafiq müalicə və müşahidəyə alınaraq evə yola salındı".