Bal arısı zəhərindən müalicə vasitəsi kimi istifadənin tarixi Qədim Misir dövrlərinə qədər gedib çıxır. O zaman bu müalicə metodundan məşhur loğmanlar istifadə ediblər. Bu barədə yazılara qədim tibbi kitablarda da rast gəlmək olur. Hazırda isə arı zəhərindən xəstələrə inyeksiya etməklə müalicə aparılır. Müalicə zamanı zəhərin dozası düzgün hesablanmalıdır.

Aztibb.az xəbər verir ki, arı zəhəri iltihab əleyhinə təsirə malikdir. Bal arısının zəhərində metilin, adolapin və apamin maddələri həm yerli və həm də ümumi iltihab sorucu təsir göstərir. Həm də bu kimyəvi maddələr sayəsində orqanizmin təbii hormon miqdarında artış olur ki, bu da orqanizmdən iltihabın sorulmasına yardım edir.

2005-ci ildə Oksford Universitetinin Yayım Mərkəzi tərəfindən aparılan araşdırmalar artritin müalicəsində bal arısı zəhərinin faydalı olduğunu təsdiqləyib.

Arı zəhərinin ikinci vacib xüsusiyyəti ağrıkəsici qabiliyyətinin olmasıdır. O, ağrını sakitləşdirir. Zəhərin tərkibindəki adolapin maddəsi təbii ağrıkəsicidir.

Bəzi insanlarda arı zəhərinə qarşı allergiya olur. Belə adamları arı zəhəri ilə müalicə etdikdə zəhəri onun orqanizminə az-az, öyrəşdirə-öyrəşdirə yeritmək lazımdır.

Bal arısı zəhəri vasitəsilə skleroz, revmatizm, artrit, akne və digər bəzi xəstəliklər müalicə edilir.