Xroniki böyrək çatışmazlığından əziyyət çəkənlərin sayı ilbəil artır. Lakin bu xəstəlik adətən özünün son mərhələsində aşkarlanır. Aparılan tədqiqatlara görə, xroniki böyrək çatışmazlığı olan xəstələrin yalnız 10%-i bu problemdən xəbərdar olur. Xəstəliyin get-gedə vüsət alması onunla mübarizə üsullarının araşdırılmasını zəruri edir.

Aztibb.az xəbər verir ki, həkim-nefroloq Barat Yusubov sosial şəbəkədə sağlam böyrəklər üçün hansı məhsulların faydalı olduğu barədə paylaşım edib.

Həmin tövsiyələri təqdim edirik:

 - Yaşıl tərəvəzlər, göyərtilər A vitamini qaynağıdır və böyrək daşlarına qarşı effektivdir. Bundan başqa kolit problemlərinə müsbət təsiri var.

 - Hər gün 3 alma böyrəklər üçün çox faydalıdır.

 - Balığın tərkibində bol miqdarda doymamış yağ turşusu, protein və vitamin var. Bu da böyrəklərin normal fəaliyyəti üçün çox vacibdir.

 - Qarpız sidikqovucu xüsusiyyəti ilə tanınır. Böyrəklərdəki qumu təmizləyir və duzun çökməsini təmin edir.

 - Balqabaq bir sıra pəhrizlərdə önəmli yer tutur və eyni zamanda böyrək problemlərinə qarşı effektivdir.

 - İtburnu bədənin xəstəliklərlə mübarizə mexanizminə dəstək olur.

 - Çovdar vitamin və liflə zəngindir. Buna görə də metabolizma və həzmi sürətləndirir.