Azərbaycana "Delta" ştammının təyini üçün tibbi ləvazimatlar gətirilib.

13 iyul Səhiyyə Nazirliyi, İcbari Tibbi Sığorta üzrə Dövlət Agentliyi və Tibbi Ərazi Bölmələrini İdarəetmə Birliyinin yaydığı birgə məlumatda bildirilib ki, Azərbaycanda 31 nəfərdə B.1.617 (Delta) variantı aşkar olunub. 

Nümunələrdən 9-da B.1.1.7 (20 Alpha V1, Britaniya) variantı aşkar edilib.

Hazırda Azərbaycanda "Delta" ştammının təyini hansı üsullarla həyata keçirilir?

Mövzu ilə bağlı Mərkəzi Gömrük Hospitalının infeksionist həkimi Mədinə Abdullayeva bildirib ki, "Delta" variantının təyin olunması üçün ayrıca testlər aparılmalıdır.

"Normal şərtlərdə PCR testlərin vasitəsilə SARS-CoV-2-nin olduğu təyin olunur. Bu testi normal laboratoriyada aparmaq mümkündür. "Delta" ştammı üçün isə xüsusi testlər aparılmalıdır. Bu testlər bioloji qoruma səviyyəsi 3 olan laboratoryalarda aparılır. Orada virusun sekans analizi aparılmalıdır ki, hansı variant olduğunu göstərsin. Bunlar da hazırda TƏBİB-in tabeliyində olan laboratoriyalarda həyata keçirilir. İstənilən laboratoriyada "Delta" və ya başqa mutasiyaların təyini mümkün deyil", - deyə infeksionist bildirib.

Mədinə Abdullayeva əlavə edib ki, hazırda Azərbaycana "Delta" ştammını təyin etmək üçün tibbi ləvazimatlar gətirilib və bunlar TƏBİB tərəfindən aparılan analizlərdə istifadə olunur.