Xəzər dənizinin qumu qızılı-qırmızı kvars qumundan ibarətdir. Xəzər qumu ilə qonşu Rusiya, Gürcüstan və Türkiyənin dəniz sahillərindəki qumu müqayisə etsək, görərik ki, Xəzər dənizinin sahilindəki qum dənələri çox kiçik ölçüdə olub güclü hiqroskopik xüsusiyyətə, yəni suyu hopdurmaq qabiliyyətinə malikdir.
Aztibb.az xəbər verir ki, bu barədə həkim-fitoterapevt Fizuli Hüseynov məlumat verib.
Həkimin sözlərinə görə, kvars qumu dəri ilə demək olar tam təmasa girir, dərinin bütün səthini örtür, özünün yığdığı günəş enerjisini çox asanlıqla bədənimizin daxilinə ötürür, dərialtı mübadiləni sürətləndirir, dərialtı kapilyar damarları genişləndirir, bununla da bütün iltihabi xəstəliklərin (revmatizm, artritlər, nevritlər və.s.) sağalmasına səbəb olur: "Limfa damarındakı durğunluğu, miozitləri (tez-tez qulunc olma) aradan qaldırır, özünün hiqroskopik xüsusiyyəti sayəsində bədənimizi tərləməyə məcbur edir. Bədənimizin artıq tullantılarını özünə hopdurur. Bu kimi xüsusiyyətləri Xəzər qumundan başqa heç bir dənizin qumunda tapmaq mümkün deyil".
F.Hüseynov əlavə edib ki, Xəzər dənizinin qumunu islaq vəziyyətdə üzə, qollara, ayaqlara sürtmək həm dərinin canlanmasına, həm də hamarlanmasına, başqa sözlə təbii şəkildə pillinqə səbəb olur. Bu üsul sellülitin müalicəsi üçün də əla vasitədir. Bu isə yalnız Xəzər qumuna aid xüsusiyyətdir.
Həkim səhər saat 12-yə qədər, axşam saat 6-dan sonra dəniz qırağında gəzməyin faydalarından bəhs edib. Qeyd edib ki, dəniz havası oksigen, maqnezium, yod, brom, natrium, kalium, kalsium və s. ilə olduqca zəngindir. Dərindən nəfəs alan zaman bunlar bizim ağciyərlərimizə daxil olur, oksidləşmə-reduksiya prosesini sürətləndirir (ona görə dəniz qırağında adam tez acır) və orqanizmin həyat qabiliyyətini artırır. Xəzərin həm havası, həm də qumu D vitamininə olan tələbatı təmin edir ki, bu da raxit xəstəliyinin qarşısını almaq üçün ən yaxşı vasitədir.
Onun sözlərinə görə, Ələt və Pirşağıda qırmızı kitaba düşmüş qırmızı kvars qum sağlamlıq üçün daha faydalıdır.