Dəmirtikan (Tribulus) Azərbaycanda çox bitməsinə baxmayaraq az istifadə olunan, lakin olduqca faydalı bitkidir. Başqa bitkilərdə olmayan özəllikləri var. Dəmirtikanın tərkibində olan tribulus adlı maddə hipofiz vəzinin fəaliyyətinin pozulması nəticəsində səviyyəsi azalan testesteronun qanda miqdarını artırır. Maraqlıdır ki, bəzən hipofiz vəzində əmələ gələn şişin təsirindən qanda testesteron səviyyəsi arta da bilər, həmin halda da dəmirtikanın istifadəsi məsləhət görülür.

Aztibb.az xəbər verir ki, bu barədə həkim-fitoterapevt Fizuli Hüseynov məlumat verib.

Həkimin sözlərinə görə, tribulus maddəsi qaraciyər fermentlərinin aktivliyini artırır, qaraciyərdə piylənmənin qarşısını alır. Kişilərdə cinsi istəyi və cinsiyyət üzvünün sərtliyini artırır, prostat vəz hiperplaziyalarında vəzin ölçülərini kiçildir. 

"Tərkibində alkaloidlər çox olduğundan gündə yalnız 1 dəfə 1 çay qaşığı 1 stəkan suda dəmlənib içilməsi məsləhətdir. Artıq qəbulu zəhərlənmə verə bilər" - deyə fitoterapevt vurğulayıb. 

F.Hüseynov qeyd edib ki, çobançökdürən bitkisi isə qadınlarda uşaqlıq ölçülərini böyüdür. (Bəzi qadınlarda uşaqlıq normadan balaca olduğundan hamiləlik baş tutmur). Çobançökdürən qadınlarda həm də hormonal pozğunluqlar zamanı istifadə edilir. O, hamiləlik zamanı baş verən düşüklərin qarşısını almaq üçün istifadə oluna bilər.