“Candida Albicans” maya göbələyi insanlarda ən çox rast gəlinən göbələk infeksiyası növüdür. Bu göbələyin mədə-bağırsaq və sidik-cinsiyyət sistemlərinin normal florasını təşkil etməsinə baxmayaraq, ekoloji mühitdə tarazlıq pozulduqda həmin orqanizmlər xəstəlik törətməyə meyilli olur. Göbələk, bədəndə artmağa başlayanda kandida xəstəliyinə səbəb olur.

Aztibb.az xəbər verir ki, son illərin gizli yayılan xəstəlikləri siyahısında olan kandidoz əsasən dəri, selikli qişa və daxili orqanları zədələyən göbələk xəstəliyidir.

Tibbdə tənəffüs, həzm və sidik-cinsiyyət sisteminin kandidozları məlumdur. Kandidoz immunitetin kəskin zəifləməsi nəticəsində inkişaf edə bilir və vaxtında müalicə olunmazsa, xroniki residivləşən formaya keçir.

Orofarinqeal kandidoz körpələrdə çox tez-tez rast gəlinən yerli infeksiyadır. Yaşlı insanlarda isə orofarinqeal kandidoz daha çox protez dişləri olanlarda rast gəlinir. Bununla yanaşı orofarinqeal kandidoz antibiotiklərlə müalicə alan, kimya terapiyası və ya baş və boyuna şüa terapiyası alan, habelə hüceyrə-əsaslı immunitetin çatışmazlığı olan xəstələrdə rast gəlinir.

Bu zaman yanaqların selikli qişası, damaq, dil və udlağın ağız boşluğu hissəsində ağ düyünlər, protezli dişlərin altında isə ağ düyünsüz yaralar müəyyən edilir. Əsas simptomlarına ağızda dad hissiyatının itməsi və bəzən də yemək qəbulu və udma zamanı ağrı hissidir.

Kişilərdə sidik-cinsiyyət sisteminin kandidozu cinsi üzvün iltihabı ilə özünü büruzə verir. Qadınlarda isə xarici cinsiyyət orqanları və uşaqlıq yolu zədələnir.

Kandidemiya Kandida göbələyinin qan dövranına daxil olduqda və digər orqanlara yayıldıqda ortaya çıxardığı ciddi bir xəstəlikdir. 

İmmun sistemi zəifləmiş insanlarda və reanimasiyada müalicə alan xəstələrdə kandidemiya riski yüksəkdir. Kandidemiyanın klinik təzahürü xəstələrdə üşütmə və yüksək hərarətin müşahidə edilməsidir.