Talassemiya xəstələrinin ən böyük problemi mütəmadi qan transfuziyası (qan köçürülməsi) ilə əlaqədar orqanizmlərində qanın toplanmasıdır. Nəticədə, qan daha çox ürək və qaraciyərdə toplanaraq zərər törədir. Belə xəstələrin müalicəsi zamanı xelator (dəmirtəmizləmə) preparatlarından istifadə olunur. Əgər ölkədə 10 il əvvəl xelator preparatının illik təminatı 10-15 min civarında idisə, bu gün 25-30 min, hətta 40 minə yaxınlaşır.

Aztibb.az xəbər verir ki, bunu Milli Hematologiya və Transfuziologiya Mərkəzinin icraçı direktoru Valeh Hüseynov deyib.

Mərkəz direktoru bildirib ki, talassemiyalı xəstələrin beynəlxalq protokola əsasən müalicəsinə başlanılıb: “Pasiyentlərin davamlı qanköçürmə nəticəsində bədəndə yığılan izafi dəmiri orqanizmindən çıxaran xüsusi dərmanlar – xelatorlarla təminatı 2-3 dəfə artıb. Buna baxmayaraq, problem hələ də aktual olaraq qalır. Orqanizmində ferritin (toplanmış dəmir) səviyyəsi yüksək olan pasiyentlərin xelatorlarla təminatından savayı, onların müayinəsini də ödənişsiz təşkil etmək istəyirik.

Digər problem isə bölgələrdəki talassemiyalı xəstələrlə bağlıdır. Lakin icbari tibbi sığortanın tətbiqindən sonra regionlarda vəziyyətin yaxşılaşdırılması istiqamətində ciddi işlər həyata keçirilir. Yaxın gələcəkdə problemlərin həll olacağını hesab edirəm”.