Dünyada, eləcə də Azərbaycanda rinoplastikaya (burun estetik əməliyyatı) tələbat artıb. Rinoplastika burnun anadangəlmə və ya qazanılmış deformasiyalarının düzəldilməsi, eləcə də olmayan burnun tam bərpa edilməsidir. Rinoplastika üçün pasiyentlər ilk öncə müayinədən keçərək onların bu əməliyyata uyğun olub-olmadıqları müəyyən edilir.

Aztibb.az xəbər verir ki, burnun estetik əməliyyatı barədə estetik, plastik və rekonstruktiv cərrahiyyə mütəxəssisi Sami Samin məlumat verib.

Həkim-mütəxəssis bildirib ki, burun estetik əməliyyatı 16 yaşını tamamlamış qızlar və 17 yaşdan yuxarı oğlanlar üçün uyğundur: “Burnun 22 yaşa qədər inkişaf etdiyi doğrudur, lakin 16-17 yaşlarda inkişafın 90 faizi tamamlanmış olduğu üçün rinoplastika əməliyyatını icra etmək mümkündür. Rinoplastika üçün ən uyğun burunlar normal qalınlıqda dərisi olan burunlardır. İncə və qalın dərili burunlarda isə daha yaxşı nəticə əldə etmək üçün xüsusi manevrlər etməyə ehtiyac var. Ümumiyyətlə rinoplastika zamanı xəstənin dərisinin rəngi və qalınlığı, ümumi üz quruluşu mühüm rol oynayır. Pasiyentlərin fotolarına “Fotoşop” vasitəsilə baxıb planlama edirik. Nəticədə, üz quruluşunun horizontal və vertikal olmaqla bütün estetik cizgilərinə əsasən, burnunun hansı hissəsinin böyük və ya kiçik olduğunu müəyyən edirik”.

Sami Samin, həmçinin nazik burunların əməliyyatla genişləndirilməsi barədə də danışıb: “Rinoplastika etdirmək yalnız burnu kiçiltmək deyil. Bəzi pasiyentlərin estetik cizgilərinə nəzər yetirdikdən sonra aydın olur ki, onun burnunu genişlətmək lazımdır. Azərbaycanda burun genişlətmə əməliyyatına çox az hallarda ehtiyac olur. Təxminən hər 30 əməliyyatdan yalnız biri burun genişlətməsi ilə bağlıdır. Onların əksəriyyəti də ikinci dəfə rinoplastikaya müraciət edənlərdir. Belə ki, birinci uğursuz əməliyyat nəticəsində burnu çox nazikləşən pasiyentlər burun genişlətmə əməliyyatına girməyə məcbur olurlar. Qeyd edim ki, həddən artıq nazikləşdirilmiş, həmçinin burun dəliklərinin aşkar göründüyü burunları uğursuz əməliyyatın nəticəsi kimi qiymətləndirmək olar”.

Həkim-mütəxəssis deyib ki, vətəndaşlar bir çox hallarda hesab edirlər ki, qapalı rinoplastika daha yeni üsuldur.

“Rinoplastikanın açıq və qapalı olması üzrə iki yerə ayrılması son dövrlər pasiyentləri çaşdırır. Qeyd etmək istərdim ki, rinoplastikanın qapalı formada keçirilməsi daha təhlükəsiz və tibb aləmində yeni üsul deyil. Çünki müasir rinoplastika 1917-1918-ci illərdə ilk dəfə tətbiq edildikdə elə qapalı üsulla həyata keçirilib”, - deyə S.Samin fikrini tamamlayıb.