Aztibb.az xəbər verir ki, Mərkəzi Gömrük Hospitalının diyetoloqu Məlahət Kərimova bildirib ki, çərəzlərin zəngin tərkibi insan orqanizminin vitamin, minerallar və təbii yağlara olan ehtiyacını ödəyir. Eyni zamanda, çərəzlərin tərkibində olan liflər, vitaminlər, minerallar və antioksidantlar bir çox xəstəliyə qarşı qoruyucu rol oynayır. Yay mövsümündə qoz, fındıq, fısdıq, badam, iydə və innabı qurudulmamış halda qəbul etmək lazımdır.

 

Həkim bildirib ki, çərəzlər, xüsusilə fındıq insan orqanizmi üçün faydalı olan doymamış turşular – olein və linolenlə zəngindir. Bu da diabet riskini azaldır, sinir sistemi üçün faydalıdır və immun sistemini gücləndirir. Qoz orqanizmi bitki tərkibli omeqa-3 yağ turşusu ilə təmin edən yeganə çərəzdir. E vitamini və alfa-linolen turşusu ilə zəngin olan qoz sinir sisteminə müsbət təsir edir, damarların kirəclənməsinin qarşısını alır, xolesterin səviyyəsini normallaşdırır, Alzheimer və diabet xəstəliklərinin yaranmasını ləngidir:

 

"Badamın tərkibi E vitamini, lif, maqnezium, kalsium, fosfor, dəmir və sink ilə zəngindir. Badam qan təzyiqini tənzimləyir, beynin fəaliyyətini yaxşılaşdırır. İydə və innab müxtəlif xəstəliklərə qarşı orqanizmin müqavimətini artırır. İydənin kalori dəyəri aşağı olduğundan və C vitamini ilə zəngin olduğundan arıqlamada, soyuqdəymə və tənəffüs yolları infeksiyalarında faydalıdır. Çərəzlərin saxlanma şəraiti də vacibdir.

 

Çərəzlər bütov olmalı, üzərində kif, çat olmamalı, qoxu gəlməməlidir. Bu məqamlara riayət etməmək zəhərlənmələrə səbəb ola bilər".