Elektron siqaret miokard infarktı riskini artırır? - İnvaziv kardioloq - aztibb.az AZƏRBAYCANIN SƏHİYYƏ XƏBƏR PORTALI

Elektron siqaret miokard infarktı riskini artırır? - İnvaziv kardioloq

01.07.2021 10:53

Nikotin və siqaret asılılığından azad olmaq üçün elektron siqaretlərdən istifadə edilməsi gözlənilən effektivlik və təhlükəsizliyi nümayiş etdirməyib.

Aztibb.az xəbər verir ki, Mərkəzi Gömrük Hospitalının invaziv kardioloqu Emin Hacıbalayev “Həkim məsləhəti” rubrikasında “Elektron siqaretlərin istifadəsinin sağlamlığa təsirləri” mövzusunda məlumat verib.

Həkimin sözlərinə görə, son vaxtlar daha çox gənclər arasında populyar olan elektron siqaretlərin istifadəsinin sağlamlığa bir sıra mənfi təsirləri var. Veypinq kiçik bir cihaz vasitəsi ilə icra olunur, tərkibindəki maye isidici elementlərin üzərinə verilir və buxarlanaraq aparatin siqarabənzər hissəsinə yönəlir. Buxarlanan maye tərkibinə görə fərqlənir, lakin əsasən 3 hissədən ibarət olur: propilen qlikol, bitki qliserini, distillə edilimiş su. Bundan əlavə, nikotin, boyaq maddələri və aromatizatorlardan istifadə olunur:

"Nikotinin faiz nisbəti 0%-dən 3.6%-ə kimi dəyişə bilər. Mayenin tərkibi ilə bağlı standartların olmadığı və keyfiyyət yoxlanması aparılmadığına görə, tərkibinə əlavə toksik maddələr də qatıla bilir.Elektron siqaretlər Braziliya, Kanada, Danimarka, Türkiyə, Norveç, Avstraliya, Uruqvay, İordaniya, İtaliya, BƏƏ kimi ölkələrdə qadağan olunub. 2008-ci ildə ÜST tərəfindən elektron siqaretlərin nikotinəvəzedici təsirinin sübut olunmadığı müəyyən edilib və sağlamlığa ziyansız bir üsul kimi reklam olunması qadağan edilib.

Tədqiqatlarda aşkar olunub ki, elektron siqaret istifadəsi hüceyrələrin DNT-sinə təsir edə bilər. Veypinq onkoloji xəstəliklər riskini artırır, ağ ciyərlərə və bronxial sistemə mənfi təsir göstərir, ürəkdə miokard infarktı riskini yüksəldir. Bununla belə, adi siqaret çəkilməsi ilə müqayisədə bu risklərin daha az olduğu müəyyən edilmişdir".