Əmək və Əhalinin Sosial Müdafiəsi Nazirliyinin Protez-Ortopedik Bərpa Mərkəzinin əməkdaşları tibb üzrə fəlsəfə doktoru, həkim ortoped protezçi Samirə Şıxəliyevanın rəhbərliyi ilə avqustun 22-də Ağsuya gəlib və mərkəzi xəstəxanada 16 nəfər əlili reabilitasiya vasitələri ilə təmin ediblər.
Səyyar xidmət çərçivəsində rayonda əlilliyi olan şəxslərin müraciətləri əsasında onların müayinələri aparılıb, müvafiq ölçülər götürülüb.
Əlilliyi olan şəxslər ehtiyac duyduqları reabilitasiya vasitələri ilə təmin edilmələrindən razılıqlarını bildiriblər. Onlar həssas əhali qrupuna göstərilən diqqət və qayğıya görə Prezident İlham Əliyevə minnətdarlıq ediblər.
Qeyd edək ki, Protez-Ortopedik Bərpa Mərkəzi koronavirus pandemiyası ilə əlaqədar tətbiq olunan karantin rejimi şəraitində səyyar xidmətlərini davam etdirir. 8 bölgə - Salyan, Neftçala, Kürdəmir, Ucar, Göyçay, Şamaxı, Qobustan və Ağsu rayonları üzrə, ümumilikdə 178 nəfər əlilliyi olan şəxsə ehtiyac duyduqları 868 reabilitasiya vasitəsi verilib.