Uşaqlarda piylənmə kalorili qidalarla və ayaqüstü qidalanmadan, az hərəkətlilikdən, şirin qazlı içkilərdən hədsiz istifadə zamanı baş verə bilər.
Aztibb.az xəbər verir ki, piylənmə uşaq və yeniyetmələrdə ciddi xəstəliklərdən hesab edilir. Mütəxəssislər uşaqlarda piylənməni təhlükəli hesab edirlər. Onların fikrincə, yeniyetmə yaşına qədər piylənmə uşaqların normal inkişafı üçün təhlükəli sayılır. O, uşaqların inkişafını ləngidir.
Mütəxəssislər piylənmə ilə böyüyən uşaqlarda müxtəlif xəstəliklərin, o cümlədən endokrin sistemi xəstəliklərinin əmələ gəlmə riskinin böyük olduğunu söyləyirlər. Belə ki, piylənməsi olan uşaqlarda şəkərli diabet, arterial təzyiq, qanda xolesterolun miqdarının artması müşahidə olunur.
Piylənmə uşaqların psixologiyasına da mənfi təsir edir. Piylənmədən əziyyət çəkən uşaqlar özünə qapalı olurlar və tez depressiyaya düşürlər.
Uşaqlarda piylənmə ilə mübarizə aparmaq üçün bütün ailə üzvlərinin onunla birgə əmək sərf etməsi lazımdır. Mütəxəssislər belə uşaqları olan ailəyə hamılıqla birgə sağlam həyat tərzi yaşamağa başlamağı məsləhət görürlər. Onlar bütün ailənin bir süfrədə və piylənməyə səbəb olmayan qidalarla qidalanmağı tövsiyə edirlər. Mütəxəsisslər bütün ailə üzvlərinin birlikdə piyada gəzintiyə getməyini, birlikdə fiziki əməklə məşğul olmağının uşağa çox faydalı olacağını söyləyirlər. Ailə üzvlərinin uşaqla birlikdə etdikləri, uşaq üçün bir stimul olacaq və o, hətta arıqlamağa könüllü olaraq razılıq verəcək.
Artıq çəkidən əziyyət çəkən uşağı olan hər bir valideyin öz övladının gələcək sağlamlığı üçün onun çəkisinin normaya düşməsi üçün əlindən gələni etməlidir.