Son illər kiçik yaşlı uşaqların sağlamlığının və inkişafının təmin olunması məqsədilə hamilə qadınların, yenidoğulmuşların və kiçik yaşlı uşaqların ailələrinə ev ziyarətləri üzrə xidmətlər təqdim edilir. Lakin bir çox hallarda göstərilən xidmətlərin məzmunu erkən dövrlərdə uşağın inkişafı üçün vacib olan qlobal məlumatlarla dəstəklənmir. UNICEF-in keçirdiyi qiymətləndirmələr göstərib ki, hamilə qadın və kiçik yaşlı uşaqların ailələrinə yönəlmiş ev ziyarətləri fiziki sağlamlığa tam dəstək vermir. Ev mühitində uşağın sağlamlığına, rifahına və nailiyyətlərinə təsir edən vacib məsələlər, yəni valideynlər və uşaqlar arasında münasibətlər, uşaqların həssas və qayğıkeş tərbiyəsi, stimullaşdırıcı və təhlükəsiz ev mühiti, uşağa qarşı qəddar münasibət və ya laqeydliyin qarşısının alınması, eləcə də risk və ya zəifliyin erkən aşkarlanması hələ də layiqincə həllini tapmır. Tibb işçilərinin bütün ailələri əhatə etdiyi nəzərə alınsa, onda ev ziyarəti xidmətlərinin kiçik yaşlı uşaqların həyatlarına uğurlu başlamaq üçün valideynlərə dəstək üçün vacib rol oynadığı məlum olar.

Aztibb.az xəbər verir ki, artıq bəzi rayonlarda Səhiyyə Nazirliyi və UNICEF-in dəstəyi ilə ölkə üzrə “Bəsləyici qayğı üzrə ailələrə dəstək” mövzusunda patronaj tibb bacılarının hazırlanmasına dair təlimlərə başlanılıb.

Bu məqsədlə 2 saylı Baza Tibb Kollecində Bakı, Sumqayıt, Gəncə, Lənkəran, Mingəçevir şəhərləri, Şəki, Quba və Saatlı rayonlarının tibb kolleclərinin müəllim heyəti üçün “Ailələrə dəstək üzrə ev ziyarətçilərinin hazırlanması”na dair növbəti təlim keçirilib. Təlim paketinin modulları üzrə geniş təqdimatlar və praktiki məşğələlər iştirakçılara təqdim edilib. Təlimləri Əziz Əliyev adına Azərbaycan Dövlət həkimləri Təkmilləşdirmə İnstitutun pediatriya kafedrasının əməkdaşları dosentlər Mətanət Qaraxanova, Sənubər Vəliyeva və Nigar Hacıyeva aparıblar.

Gələcəkdə də tibb bacıları üçün uşaqların inkişafı və sağlamlığına dair təkmilləşdirilmə kurslarında həmin modulların mütəmadi tədris edilməsi ailələrə dəstək olmaq baxımından yararlı olacaq.