Dondurma uşaqların ən çox sevdiyi qida alternativlərindəndir. Dondurma protein, karbohidrat, yağ kimi qida maddələrindən əlavə, B qrup vitaminləri və A,D,E kimi faydalı vitaminlərlə də zəngindir. Bundan başqa dondurma uşaqların böyümə və inkişafına təsir edən kalsium (Ca), fosfor (P), maqnezium (Mg) kimi minerallarla da zəngindir. Uşaqlarınıza dondurma yedirərkən qorxmağa gərək yoxdur.

 

Aztibb.az xəbər verir ki, bunu tanınmış həkim-pediatr Günay Rəsulova deyib.

 

Həkim bildirib ki, dondurma alarkən mütləq aşağıdakılara diqqət edilməlidir:

 

- Dondurma etibarlı markadan olmalı;

- Paketli olmalı (üzərində qida tərkibi və kalori dəyərini görmək üçün);

- Gigiyenik olaraq standartlara uyğun şəraitdə hazırlanmış olmalı (Süd məhsulları tez xarab olan və yararlılığını tez itirən qida olduğu üçün);

- Düzgün saxlanma şəraitinə riayət edilmiş olmalı (-18C soyuq zinciri qırılmadan saxlanılmalı).

 

Dondurmada qoruyucu maddələr yoxdur. Uşaqlar hər fəsildə, qış da daxil olmaqla dondurma yeyə bilər. Valideynlər arasında "dondurma yemək boğaz ağrısına səbəb olar" kimi yanlış fikir vardır. Dondurma boğaz ağrısı yaratmaz. Soyuq su və ya soyuq yeməklərin boğaz ağrısına səbəb olmasının heç bir tibbi əsası yoxdur. 

 

Lakin bir məsələdə diqqətli olmaq lazımdır. Düzgün saxlanılmamış və hazırlanmamış dondurmada zərərli xəstəliktörədici bakteriyalar artıb çoxala və uşaqlarda bir sıra narahatlıqlara səbəb ola bilər. Unutmayın ki, dondurma yemək uşaqlarda həzz mərkəzini oyadaraq onların özlərini xoşbəxt hiss etmələrinə səbəb olar.