Əl və ayaqlardakı tikanbatmalar şübhəsiz bədəninizdəki hər hansı başqa xəstəlikdən xəbər verir. Bu əlamətlər əsasən şəkərli diabet, B12 vitamini azlığı və tiroid pozğunluqları zamanı özünü göstərir.

Aztibb.az xəbər verir ki, bu barədə həkim-nefroloq Barat Yusubov məlumat verib. Həkimin sözlərinə görə, davamlı olan, bəzən şiddətlənən, bəzən yavaşlayan əl və ayaq keyimələri zamanı mütləq həkim müayinəsi aparılmalıdır. Ümumi olaraq əl və ayaqlardakı keyimə nevropatiya adlanan sinirlərin zədələnməsi ilə yaranan xəstəliklərdən qaynaqlanır. Bu da, genetik olaraq, bəzi viruslara, immun sisteminin fərqli çalışmasına, şəkərli diabet, guatr, böyrək və ya qaraciyər çatışmazlığı kimi xəstəliklərə və ya B12 vitamini, fol turşusu kimi bəzi maddələrin əksikliyinə bağlı olaraq yarana bilər.

Diabet: Diabetin kontolsuz olması və başlama müddəti nevropatiya üçün çox vacib faktordur. Şəkərli diabetdə əl və ayaqda keyimə, ağrı tikanbatma kimi şikayətlər ön planda olur.

Tiroid pozğunluğu: Tiroid hormonunun səviyyəsindəki artma vəya azalma nevropatiyaya səbəb ola bilər. Burada da hormon səviyyəsinin uzun müddət pozulmuş halda qalması şikayətlərə səbəb olur.

Böyrək çatışmazlığı: Böyrək çatışmazlığı nəticəsində qanda sinirlər üçün toksik olan bir miqdar maddələrin yığılması nəticəsində şikayətlər ortaya çıxır.