Depressiya və digər əhval-ruhiyyə pozuntularından əziyyət çəkən qadınlara adətən hamiləlik zamanı antidepressantların qəbulunu davam etmək tövsiyə edilir. Bu dərmanlar təhlükəsiz hesab edilir, lakin çoxları bətndəki uşağa onların təsirinə dair narahatlıq keçirirlər.

Aztibb.az-ın medikforum.ru-ya istinadən məlumatına görə, "Biological Psychiatry" jurnalında təqdim edilmiş yeni tədqiqat çərçivəsində alimlər göstəriblər ki, ananın psixi pozğunluqları autistik spektr pozuntusu (ASP) və uşaqda inkişaf ləngiməsi (İL) riskini artırır.

Yeni tədqiqatın müəllifi doktor Cennifer Eyms həmkarları ilə birgə apardığı araşdırmada ABŞ-da 2003-cü ildən 2011-ci ilə qədər doğulmuş minlərlə uşağın inkişafı haqqında informasiyanın toplandığı erkən inkişafın öyrənilməsi (SEED) üzrə tədqiqat işindən istifadə edib.

SEED-in cari məlumat analizi uşaqların üç qrupunu özündə ehtiva edib: ASP-li (1,3 min); İL-li (1,7 min); və diaqnozsuz (1,6 min). Tədqiqatda anaların üçdə biri hamiləlikdən əvvəl və ya hamiləlik zamanı psixi xəstəliyə malik olub və onlardan dörddə biri antidepressantlar qəbul edib.

Analiz olunmuş məlumatlar göstərib ki, psixi pozğunluqları olan anaların uşaqlarında ASP və ya İL riski iki dəfə yüksəkdir.