Dializ müəlicəsi övlad sahibi olmaq üçün maneə təşkil etmir. 

Aztibb.az xəbər verir ki, bu barədə həkim-nefroloq Barat Yusubov məlumat verib.

Həkimin sözlərinə görə, uremiya kişilərdə həm potensiyaya, həm də spermatogenezə təsir etsə də, dünyaya normal övlad gətirmək üçün problemə səbəb olmur.

"Kişilərdə olduğu kimi, qadınlarda da uremiya həm libidoya, həm də reproduktiv qabiliyyətə təsir edir, lakin bir çox qadınlarda heç bir pozğunluq olmaya da bilər. Bu cür pozğunluqları olan qadınlar isə çox asan şəkildə müalicə olunaraq ana ola bilər", - deyə həkim qeyd edib.

B.Yusubov bu zaman bir neçə məqama diqqət yetirməyin vacibliyinə toxunub:

- Sağlam qadınlarla müqayisədə dializ müalicəsində olan xəstələrdə hamiləlik daha risklidir;
- Hamiləlik planlaşdırmadan öncə mütləq müalicə həkimə bildirilməlidir, çünki bəzi dərmanlar hamiləlikdən öncə dəyişdirilir (məsələn təzyiq dərmanları);
- Hamilə qaldığınız ilk andan tıbbi personala bildirin, çünki hamiləliyin ilk dövründən sizə xüsusi dializ rejimi təyin olunacaq;
- Dializ xəstəsi ana ola bilər, amma ideal olanı hamiləliyi böyrək köçürəndən sonraya planlamaqdır;
- Böyrək köçürənlər isə bilməlidir ki, ilk 1 ildə hamiləlik tövsiyə olunmur. Bu dövrdə hamiləlikdən qorunmaq mütləqdir.