Hazırda koronavirusun 80-dən çox ölkədə görülən Delta variantı, İngiltərədə ortaya çıxan Alfa variantından daha çox yoluxucu və ölümcül olması ilə narahatlıq yaradır.

Təfərrüatlar

Aztibb.az xəbər verir ki, dünya koronavirusun üçüncü dalğası ilə mübarizə apararkən, dördüncü dalğanın gözlənildiyindən çox tez gələ biləcəyi bildirildi. Delta variantı 80-dən çox ölkəni təhdid etməkdədir. Kütləvi peyvəndləmə aparılmasına baxmayaraq, Hindistan və İngiltərədə yoluxmada artım var. Tədbirlərə başlayan Almaniya Delta variantının səbəb ola biləcəyi növbəti pandemiya dalğasından ehtiyat edir.

Delta variantının səbəb olduğu (B.1.617.2) ilk sənədləşdirilmiş yoluxma hadisəsinə Hindistanın Maharaştra əyalətində 2020-ci ilin oktyabrında rast gəlinib. Delta variantı o vaxtdan bəri bütün dünyada ciddi şəkildə yayılmaqdadır. Ümumdünya Səhiyyə Təşkilatı (ÜST) da Delta variantı ilə bağlı narahatlığını açıqladı.

Dördüncü dalğa xəbərdarlığı!

Mütəxəssislərdən Delta variantı ilə bağlı ardıcıl açıqlamalar verilir. Alimlər Delta variantının yayılmağa davam edəcəyi təqdirdə, epidemiyada dördüncü dalğanın gələ biləcəyini xəbərdarlıq edib.

Açıqlamalarda deyilir ki, əhalisinin böyük əksəriyyətinin ikinci doza peyvənd olunduğu İngiltərədə Delta variantı hələ də artmaqdadır. Kifayət qədər diqqətli və ehtiyatlı olmasaq, dördüncü dalğa ilə qarşılaşa bilərik.