Aztibb.az xəbər verir ki, həkim-reanimatoloq Şahin Məmmədov sosial şəbəkədə "3-cü əl siqaret çəkmək" nədir? sualına aydınlıq gətirib.

 

Həkimin sözlərinə görə, siqaret tüstüsü özündə 7000 kimyəvi maddə daşıyır və onlardan çoxunun müxtəlif xəstəliklərin əmələ gəlməsində rolu təsdiqlənib. Təkcə xərçəng xəstəlikləri üçün 70 maddənin rolu sübut edilib:

 

"Birinci əl siqaret çəkmək" - siqaret çəkənin özüdür, ən böyük riski o daşıyır. "İkinci əl siqaret çəkmək" barədə də çoxu bilir. Siqaret tüstüsünə kənardan məruz qalan insanlar buraya aiddir. Bu mənada xüsusilə uşaqlar və qadınlar zərər görür. Mütəmadi tüstü ilə kontakt siqaret çəkməyən insanlarda da xərçəng əmələ gətirir.

 

Bir də var "3-cü əl siqaret çəkmək". Siqaret qapalı yerdə çəkildikdə - otaqda, maşında və s. tüstü əşyaların üzərinə hopur. Məsələn, divarlara, xalçanın üzərinə, əyləşdiyiniz divanın üzərinə və s. Bu maddələrdən yaxa qurtarmaq üçün əslində otaqda nə varsa hamısını tullamaq lazımdır. Çünki kimyəvi təmizləmə də bu çirki tam apara bilmir. Uşaqlar həmin yerə toxunurlar, sonra əllərini ağızlarına tez-tez vurduqları üçün xərçəng riski altına düşürlər".

 

Həkim hətta siqaret çəkən insanın geyiminin şkafda uşaqların geyiminə toxunmamalı olduğunu da əlavə edib.