Bu gün hemodializ alan pasientlərin sayının artmasındakı ən vacib faktorlardan biri damaryolu əməliyyatlarındakı uğurlu inkişafdır. Çünki düzgün tətbiq edilmiş damaryolu hemodializ pasientlərinin böyrək nəqli olmadan da, uzun illər boyu rahat yaşaya bilməsini təmin edir.

 

Aztibb.az xəbər verir ki, bu barədə həkim-nefroloq Barat Yusubov məlumat verib. 

 

Həkim qeyd edib ki, bəzi pasientlər uyğun donor olmadığı üçün, bəzilərinə əks göstəriş olduğu üçün, bəziləri isə maddi vəsait kifayət qədər olmadığından böyrək nəqli etdirə bilmir. Bu halda pasientin həyatının davam etdirilməsinə səbəb dializ ala bilməsidir, dializ ala bilməsi üçün isə labüd olan damar yoludur.

 

"Qalıcı damar yoluna sahib olmayan pasientlər ən qısa zaman içində ölümə məhkum olurlar. 1962-ci ildə ilk dəfə Brescio və Shmino tərəfindən aparılan klassik fistul əməliyyatı hemodializdə bir cığır açmışdır. Bu hadisədən öncə, hemodializ üçün lazım olan qan kanula və kateterlərdə saxlanılırdı. Bu metodlar isə pasientin xəstəxanada qalmasına məcbur edir və həftələrlə günün müəyyən saatları dializ almasına imkan yaradırdı. Bu metodların riski çox yüksək idi. Bundan başqa, hemodializ aparatları və filterlər kifayət qədər deyildi. Bu səbəblərdən xroniki böyrək xəstələri cəmi bir neçə ay yaşaya bilirdi", - deyə həkim bildirib.

 

Onun sözlərinə görə, bu gün müasir katater və fistullar vasitəsi ilə pasientlər daha komfortlu və rahat şəkildə, xəstəxanada daha qısa vaxt keçirməklə, dializ aldıqdan sonra normal həyatlarına davam edə bilirlər.