SCImago Institutes Rankings (SIR) - tədqiqat, innovasiya nəticələri və sosial təsirlərinə görə üç fərqli göstəricini özündə birləşdirən akademik və tədqiqat müəssisələrinin təsnifatıdır. 2009-cu ildən nəşr olunan akademik qurumların qlobal reytinqidir.

 

SIR İspaniyanın bir neçə iri təhsil müəssisəsini özündə birləşdirən və Ali Elmi Tədqiqatlar Şurasının (CSIC) üzvü olan təşkilatdır. SIR elmi nəşrlərin və müəssisələrin digər məhsullarının ümumi statistikasını araşdırır və müxtəlif ölçülü qurumlar arasında müqayisə aparır.

 

Azərbaycan Tibb Universiteti dünyanın digər universitetləri kimi, bu reytinq sisteminə daxil edilib və 4 göstəriciyə görə indeksləşdirilib: ümumi, elmi tədqiqat, innovasiya və ictimai göstərici. Scimago sıralamasına görə, Azərbaycan Tibb Universiteti 2021-ci ildə ümumi göstəriciyə əsasən dünyanın 7533 universiteti arasında 899-cu yerdədir.

 

Tədqiqat göstəricilərinə görə, universitetin reytinqi 529-dan 517-ci yerə yüksəlib ki, bu da əməkdaşlar tərəfindən "Web of Science", "Scopus" və s. nəşriyyat bazalarına daxil olan jurnallarda çap olunmuş məqalələrin sayının artması ilə əlaqədardır.

 

İnnovasiya və sosiallaşma göstəricilərinə gəldikdə isə, təəssüf ki, reytinq düşüb və 2021-ci ildə ATU müvafiq olaraq 547 və 251-ci yerləri tutub. Dünya tibb müəssisələri arasında Azərbaycan Tibb Universiteti 920-ci, Şərqi Avropada 170-ci, Azərbaycanda isə 1-ci yeri tutur.

 

Universitetin əməkdaşları son iki ildə Scopusa daxil olan 32 elmi jurnalda ("Psycho-Oncology", "Medicine and Low" və s.) elmi işlərini çap etdiriblər. 

 

Beləliklə, Azərbaycan Tibb Universiteti Scimago reytinq sistemində tədqiqat göstəricilərinə görə, dünya və yerli universitetlər arasında layiqli yer tutur və hazırda bu reytinq sistemi üzrə digər göstəricilərin yaxşılaşdırılması, eləcə də ATU-nun QS World University Ranking, Times Higher Education University Ranking, World University of Academic Ranking (ARWU) reytinqlərinə daxil edilməsi istiqamətində işlər aparılır.