Suprakondulyar sınıqlar uşaqlarda ən çox görülən və daha çox 5-7 yaş uşaqlarda təsadüf olunan sınıqlardır. Travmanın alınma mexanizmi birbaşa qolun üzərinə düşmə nəticəsində baş verir. Sınığın olduğu yerdə ağrı, şişkinlik, yuxarı ətrafda deformasiya, ətrafın hərəkət etdirə bilməməsi kimi əlamətlərlə özünü biruzə verir.
Aztibb.az xəbər verir ki, bu barədə N.Tusi adına Klinikanın travmatoloq-ortoped həkimi Türkel Hüseynov məlumat verib.
"Travma alındığı nahiyədən damar-sinir elementləri keçdiyinə görə zədələnmə ehtimalı yüksəkdir. Bu səbəbdən valideynlərin dərhal həkimə müraciət etmələri tövsiyə olunur", - deyə həkim bildirib.
Onun sözlərinə görə, sınıq fraqmentləri düzgün müalicə olunmadıqda gələcəkdə etrafın deformasiyasına səbəb ola bilər.
"Müalicəsi sınıq fraqmentlərinin vəziyyətindən asılı olaraq konservativ və cərrahi yolladır. Xəstələr 3-5 həftə müddətində sağalaraq əvvəlki həyatlarına qayıda bilərlər".