Azərbaycan Tibb Universitetinin I Cərrahi xəstəliklər kafedrasının əməkdaşı, Azərbaycan Bariatrik-Metabolik Cərrahlar Assosiasiyasının sədri, t.ü.f.d. Tariyel Ömərov bariatrik metabolik cərrahiyyədə növbəti uğuru ilə bir ilkə imza atıb.
Aztibb.az xəbər verir ki, tanınmış cərrahın mədəkiçiltmə əməliyyatlarında icad etdiyi yeni bir modifikasiyası artıq beynəlxalq aləmdə təsdiqini tapıb və o, bu yeniliyinə görə patent alıb.
Avrasiya Patent Təşkilatı (Euroasian Patent Organization) Tariyel Ömərova Laparoskopik Bariatrik cərrahiyyə əməliyyatları zamanı tətbiq etdiyi yeni modifikasiyanın patentini təqdim edib. Artıq bariatrik metabolik cərrahiyyənin yeni bir modifikasiyası sırf azərbaycanlı cərrahın adı ilə bağlıdır.
T.Ömərov bildirib ki, bu üsulun yaradılması üzərində 2013-2017-ci illərdə işləyib: "Elə 2017-ci ildə bu metodla bağlı patent alınması üçün Avrasiya Patent Təşkilatına müraciət etdik. Sevinc və qürur hissi ilə bildirmək istəyirəm ki, uzun və əziyyətli bir yoldan sonra artıq patentimizi almışıq. Qürurluyam ki, ölkəmizin Bariatrik Metabolik cərrahiyyəsi ilə bağlı beynəlxalq tibb arenasında daha bir ilk addım bizə məxsusdur".