Koronavirusdan sonra ortaya çıxan MIS-C xəstəliyi sürətlə yayılır. MIS-C xəstəliyi koronavirusa yoluxmuş uşaqlarda olur və sağlamlıqları  üçün risk yaradır.

Aztibb.az xəbər verir ki, sindrom koronavirusa yoluxmadan sonra dörd həftə ərzində inkişaf edə bilər. Xəstəlik əsasən 2-15 yaş arası uşaqlarda rast gəlinir.

MIS-C xəstəliyi nədir?

Bu xəstəlik immunitet sisteminin pozulmasının yeni bir formasıdır. Çox sistemli iltihab sindromu (MIS-C) uşaqlarda ürək, ağciyər, böyrək, beyin, dəri, göz və mədə-bağırsaq orqanları da daxil olmaqla müxtəlif bədən hissələrinin iltihablanmasına səbəb olur. MIS-C olan uşaqlarda hərarət, qarın ağrısı, qusma, ishal, boyun ağrısı və ya son dərəcə yorğun olmaq kimi müxtəlif simptomlar müşahidə edilir. MIS-C hətta ölümcül də ola bilər, lakin bu xəstəlik diaqnozu qoyulan uşaqların əksəriyyəti tibbi yardımla sağalır.

Xəstəlik çox yeni olduğundan simptomlar uşaqdan-uşağa dəyişə bilər. Diqqət yetirilməli olan ən vacib məqam isə davamlı qızdırmanın olmasıdır. MIS-C həm də gözlərin qızarması, dilin, əl və ayaqların şişməsi, dodaqların çatlaması, dəridə suluqlanma və digər xüsusiyyətlərlə bilinir. Bundan başqa, COVID-19-da olduğu kimi davamlı öskürək və nəfəs darlığı halları da ola bilər.

Uşaqlarda MIS-C sindromuna səbəb olan nədir? 

MIS-C-nin səbəbi hələ tam öyrənilməyib. Bəzi tədqiqatçılar MIS-C-nin koronavirusa qarşı gecikmiş immunitet reaksiyasından qaynaqlandığını deyirlər. İmmunitet reaksiyasına səbəb isə uşaqların virusa qarşı yaratdığı antitellərin də olması mümkündür. Eyni zamanda genetik faktorların da rolu qaçılmazdır.