Son həftələrdə elm adamları tərəfindən aparılan araşdırmalar nəticəsində ilk dəfə 2017-2018-ci illər arasında rast gəlinən və sətəlcəmə səbəb olan yeni koronavirus növünün aşkarlandığı açıqlanıb.

Aztibb.az xəbər verir ki, tədqiqatçılar bu virusun insana itlərdən keçdiyini bildiriblər.

“Yeni kəşf edilmiş bu virus növü patogen (xəstəlik yaradan) kimi təsdiqlənəcəyi təqdirdə, COVID-19-dan sonra 8-ci koronavirus növü kimi tibb ədəbiyyatına düşəcək” , – tədqiqat qrupu açıqlayıb.

Araşdırma aparan elm adamları Malayziyanın bir əyalətində 301 xəstədən götürülmüş nümunələri tədqiq ediblər. Nəticələrə əsasən 5 yaşınadək uşaqlarda itlərdə görülən koronavirus növü aşkarlanıb.

Virus genetik xüsusiyyətlərinə görə pişiklərdə və donuzlarda rast gəlinən növlərə bənzəsə də, ancaq köpəklərdə olan, CCoV-HuPn-2018 adlı yeni bir koronavirus tipi kimi qeydə alınıb. Mütəxəssislər bu yeni virusun heyvanlardan insana keçən yeni bir koronavirus növü olduğunu, lakin insandan insana yoluxma imkanlarını müəyyənləşdirmək üçün daha çox tədqiqatlara ehtiyac duyulduğunu vurğulayıblar.

Tədqiqatın nəticələri bir həftə öncə “Clinical Enfectious Diseases Journal” akademik tibbi jurnalında dərc edilib.