Kuba SARS-CoV-2 koronavirus əleyhinə vaksininin klinik sınaqlarına gələn həftə başlayacaq. Sınaqlar 2021-ci ilin əvvəllərinə kimi davam edəcək.

Aztibb.az Kuba klinik sınaqların ictimai registrinin məlumatına istinadla bildirir ki, Dövlət Vaksin İnstitutu tərəfindən hazırlanmış vaksin SOBERANA 01 adlanacaq və əzələdaxili yeridilərək iki dozada tətbiq ediləcək.

19-80 yaş intervalına aid 676 nəfərin iştirak edəcəyi klinik sınaqlar iki mərhələdə keçiriləcək, onlardan birincisi 24 avqust bazar ertəsi günü başlayacaq.

Dövlət mərkəzi vaksin tədqiqatının başa çatmasını 11 yanvar 2021-ci il tarixinə təyin edib, tədqiqatın nəticələri fevralın 1-də açıqlanacaq və həmin ayın 15-də dərc ediləcək.

Kuba böyük biotexnologiya və əczaçılıq sənayesinə malikdir, bu da öz növbəsində ona meningit, ağciyər xərçəngi (terapevtik) və digər xəstəliklər əleyhinə vaksinləri hazırlamağa imkan verir.

COVID-19 ilə əlaqədar yeni vaksinin klinik sınaqlarının elan edilməsi əsasən Havana və ətraf rayonlarda xəstəliyin bəzi yayılma hallarının mövcud olduğu vaxt - virusun nəzarət altına alındığı güman edildiyindən sonra baş verir.

Kubada yoluxanların sayı - 3408, ölənlərin sayı isə – 88 nəfər təşkil edir.