Gələcəyin anaları hamilə qadınlar da risk qrupuna daxil olan insanlardır. Hamiləlik COVID19-un ağır nəticələrinin inkişaf riskini yüksəldir. Dünyanın bir çox ölklərində hamilə qadınlar vaksinasiya olunur. Məsələn, ABŞ-da, Böyük Britaniyada, İsraildə, Belçikada və digər inkişaf etmiş ölkələrdə belə hesab edirlər ki, vaksinasiya hamilə qadınlara nəinki zərər vermir, hətta əksinə vacibdir.

Aztibb.az xəbər verir ki, bu fikirləri Mərkəzi Gömrük Hospitalının mama-ginekoloqu Nərmin Muradova bildirib. 

"Vaksinin hamilə qadınlara heç bir təhlükəsi yoxdur və effektli olur. Burada söhbət inaktiv vaksindən gedir. İcazələr olduqdan sonra ola bilsin ki, hamilə qadınlara da vaksin vurulacaq. Koronavirus pandemiyası ilə bağlı hamilə qadınlar COVID-19 xəstəliyindən qorunmaq üçün xüsusilə diqqətli olmalı və tələb olunan maska və əlcəklərdən istifadə, ara məsafə saxlanması kimi qaydalara ciddi riayət etməlidirlər", - deyə həkim vurğulayıb.

O, əlavə edib ki, hamilə qadınlar bu xəstəliyi digərlərindən daha ağır keçirmirlər. Əsas simptomlar bunlar ola bilər: öskürək, qızdırma, təngənəfəslik, baş ağrısı və iybilmə hissinin itməsi. Bu əlamətlər yüngül və orta ağır formada özünü göstərir. Onlar koronavirusa yoluxduqda müalicə alır və tez bir vaxtda sağalırlar. Bu xəstəliyin körpələrə keçməsi faktı hələ ki, qeydə alınmayıb.