Bağlarda alaq otu kimi yetişən və çoxumuzun uzaq gəzdiyi gicitkən bitkisini hamı tanıyır. Onun nə qədər faydalı olduğu isə çoxlarına məlumdur. Tərkibində çoxlu vitaminlər, zülal, mikroelementlər, fosfor, kalium, dəmir mövcuddur. Aprel-may ayları gicitkənin bol bitdiyi mövsümdür.

Aztibb.az gicitkən bitkisindən hazırlanan min bir dərdin dərmanı çay reseptini təqdim edir.

Bu çay vasitəsilə bir çox xəstəlikləri müalicə etmək mümkündür. Gicitkən süd verən analarda süd ifrazını artırır, menstrual tsikli tənzimləyir, qan damarlarını qüvvətləndirir və qanı təmizləyir.

Bundan əlavə, bu çayı qaraciyər patologiyaları zamanı, mədə-bağırsaq traktı və tənəffüs sisteminin xəstəliklərində də təyin edirlər.

Gicitkən çayı aşağıdakı hallarda qəbul edilə bilər:

•podaqra;

•öd kisəsi xəstəlikləri;

•qaraciyər xəstəlikləri;

•revmatizm zamanı.

Əlbəttə, bu bitki xeyirli xüsusiyyətləri ilə yanaşı, bir sıra mənfi xüsusiyyətlərə də malikdir.

Belə ki, həddən artıq qəbul edildikdə qanı qatılaşdırır. Bu isə baş beynin qan damarlarında problem olan insanlarda, varikoz xəstələrində əks göstəriş hesab edilir.

Bundan əlavə, aşağıdakı hallarda gicitkən çayının qəbulu məsləhət deyil:

•qanaxmalar zamanı;

•qanın qatılılığı yüksək olarsa;

•böyrək xəstəlikləri zamanı.

Gicitkən çayının hazırlanması:

Qazana bir qədər su və gicitkən tökərək qaynadın. Daha sonra otaq temperaturuna qədər soyudaraq süzün. Yarım saat saxladıqdan sonra gündə 3 dəfə olmaqla yeməkdən 15 dəqiqə əvvəl yarım stəkan için.

Gicitkən çayını yaşıl çay və itburnu ilə birlikdə də hazırlaya bilərsiniz.