Qısa müddətdə dünyanın əsas probleminə çevrilən koronavirus bu günə qədər 21 milyon insanın yoluxmasına, 760 mindən çoxunun ölümünə səbəb olub.

Ötən müddət ərzində virusa yoluxma və müalicə üsulları ilə bağlı yanlış təsəvvürlər, inanclar yaranıb.

Aztibb.az koronavirusla bağlı tibb elmində təsdiqini tapmayan, bəzi insaların isə inandığı mifləri təqdim edir. 

Koronavirus ayaqqabı vasitəsilə keçir

COVID-19-un ayaqqabı vasitəsilə insanlara yoluxması riski çox aşağıdır. Təbii ki, ehtiyat tədbiri olaraq, körpə uşaqların oynadığı döşəmədə ayaqqabıya təmas etməməsinə diqqət etmək lazımdır. Bu isə təkcə koronavirus deyil, başqa virus və bakteriyalarla bağlı da bir növ ehtiyat tədbiridir.

Spirtli içkilər koronavirusa qarşı immunitet yaradır

Sübut olunub ki, spirtli içkidən çox istifadə heç bir immunitet yaratmır, əskinə, sağlamlıq üçün çox zərərlidir və immun sistemini zəiflədir.

Hərarət ölçən cihazlar koronavirusu aşkar edir

Hərarət ölçən cihazlar (Termal skaner) ancaq yüksək temperaturu müəyyən edə bilər və heç bir virusla bağlı diaqnoz qoya bilməz.

Acı bibər koronavirusdan qoruyur

Yeməklərinizdəki acı bibər COVID-19-un qarşısını ala və müalicə edə bilməz. Özünüzü yeni koronavirusdan qorumağın ən yaxşı yolu başqalarından ən azı 1 metr məsafə saxlamaq və əllərinizi tez-tez və hərtərəfli yumaqdır. Ümumi sağlamlığınız üçün balanslı pəhriz, mütəmadi olaraq məşq etmək və normal yuxu rejimi faydalıdır.

Koronavirus ağcaqanad vasitəsilə yayılır

Bu günə qədər COVID-19 virusunun milçək, ağcaqanad vasitəsilə ötürüldüyünə dair heç bir sübut və ya məlumat yoxdur. COVID-19-a səbəb olan virus, ilk növbədə, yoluxmuş insanın öskürdüyü, asqırdığı və ya danışdığı zaman yaranan damcılar vasitəsilə yayılır. Əllərinizi yumazdan əvvəl çirklənmiş səthə, sonra isə gözlərinizə, burnunuza və ağzınıza toxunaraq yoluxa bilərsiniz.

5G internet şəbəkəsi koronavirus yayır

Viruslar radio dalğalarında, mobil şəbəkələrdə səyahət edə bilmirlər. COVID-19 5G mobil şəbəkəsi olmayan bir çox ölkədə də yayılır.

25°C-dən yüksək temperatur koronavirusu öldürür

Havanın nə qədər günəşli və isti olmasından asılı olmayaraq, COVID-19-a yoluxa bilərsiniz. İsti hava şəraiti olan ölkələrdə də COVID-19 hadisələri barədə məlumat verilib.

İsti vanna qəbulu koronavirusun qarşısını alır

İnsanın normal bədən temperaturur 36.5 - 37°C-dir  və bu, aşağı temperatur hesab olunmur. Əgər virus bu temperaturda məhv olmursa, çox isti vanna sadəcə zərərli ola bilər.

Soyuq hava və qar koronavirusu öldürür

COVID-19-un soyuq havaya davam gətirməməsi barədə heç bir sübut öz əksini tapmayıb.