Tibbi Ərazi Bölmələrini İdarəetmə Birliyinin (TƏBİB) İdarə Heyətinin sədri Ramin Bayramlının əmri ilə 30 ildən çox müddətdə xaricdə yaşayan tibb elmləri doktoru, professor Adil Allahverdiyev V.Y.Axundov adına Elmi-Tədqiqat Tibbi Profilaktika İnstitutuna direktor təyin edilib.

Aztibb.az xəbər verir ki, Adil Allahverdiyev ilk dəfə olaraq Qlükoza-6-fosfatdehidrogenaza (G-6PD) fermentinin çatışmazlığı olan şəxslərdə istifadə edilən dərman preparatlarına qarşı həssaslığı in vitro təyin etmək üçün yeni metod işləyib hazırlamaqla problemin həll olunmasında önəmli rol oynayıb.

Onun tədqiqatlarında ilk dəfə olaraq eyni zamanda malyariya parazitlərinin eritrositar mərhələsinin daxilində “rest state” dinclik vəziyyəti aşkar edilib ki, bunun da böyük epidemioloji və müalicəvi əhəmiyyəti vardır.

Professor dünyada ilk dəfə leyşmaniozun dəri formasının və insan üçün təhlükəli olan visseral formasının diaqnostikasında yeni mikrokultura metodunu işləyib hazırlayıb. Hazırda mikrokultura metodu dünyanın müxtəlif ölkələrində (ABŞ, Çin, İspaniya, İsveç, Yunanıstan, İndoneziya, Azərbaycan və s.) uğurla tətbiq edilir.

2006-cı ildə A.Allahverdiyev Yıldız Texniki Universitetinin Biomühəndislik kafedrasına (İstanbul) dəvət edilərək, burada kafedranın qurucularından biri, Hüceyrə kulturası və toxuma mühəndisliyi laboratoriyasının isə qurucusu və rəhbəri olaraq fəaliyyətini davam etdirib. O, çox sayda beynəlxalq mükafatlara layiq görülüb. Bundan əlavə, Türkiyədə yaşadığı illərdə diaspora fəaliyyəti ilə də məşğul olub.

Qeyd edək ki, bu gün A.Allahverdiyev kollektivə təqdim edilib.