Yaponiya hökuməti işçilər arasında koronavirusun artması səbəbilə ölkədə fəaliyyət göstərən bütün şirkətlərdən onlayn iş rejimi nisbətinin 70-80 faizə qaldırılmasını tələb edib.
Aztibb.az nhk.or.jp resursuna istinadən bildirir ki, Yaponiyanın İqtisadiyyat naziri Yasutoşi Nişimura hökumətin şirkətləri onlayn iş rejimini artırmağa və digər sosial məsafə tədbirlərini həyata keçirməyə təşviq edəcəyini deyib.
O, bildirib ki, Yaponiyada məsafədən iş nisbəti təxminən 30 faizə enib. Nazir, həmçinin şirkətləri fasiləsiz növbələr tətbiq etməyə və işdən sonrakı iş yeməklərini ləğv etməyə çağırıb.
Qeyd edək ki, Yaponiyada işdən sonra bar və restoranlara gedən 40-50 yaş qruplarında infeksiyaya daha sıx təsadüf edilir. Mütəxəssislər yoluxmanın bu yaş həddindəki insanlar arasında sıx aşkarlanmasından ciddi narahatdırlar. Digər tərəfdən, Tokio və digər böyük şəhərlərdə yeni yoluxma hallarının artması epidemiyanın ikinci dalğasının yaranması ilə bağlı narahatlıqları artırıb.
