Azərbaycan Tibb Universiteti (ATU) Ümumdünya Səhiyyə Təşkilatı (ÜST) tərəfindən İsveçrənin Cenevrə şəhərində keçirilən Kimyəvi Maddələr və Sağlamlıq üzrə Qlobal Şəbəkənin üçüncü toplantısında təmsil olunub.
Universitetdən Aztibb.az-a verilən məlumata görə, ATU-nun I daxili xəstəliklər kafedrasının dosenti, tibb üzrə fəlsəfə doktoru İsmayıl Əfəndiyevin iştirak etdiyi tədbirin əsas məqsədi kimyəvi maddələrin insan sağlamlığına mənfi təsirinin azaldılması, kimyəvi təhlükəsizliyin təmin edilməsində səhiyyə və digər aidiyyəti sektorların rolunun gücləndirilməsi, ölkələr arasında təcrübə mübadiləsi və bu sahədə beynəlxalq əməkdaşlığın inkişaf etdirilməsi olub.
İ.Əfəndiyev ölkəmizdə kimyəvi təhlükəsizliyin təmin edilməsi sahəsində görülən işlər və mövcud prioritetlər barədə məlumat verib. O, xüsusilə boyaların tərkibində qurğuşunun miqdarının məhdudlaşdırılması istiqamətində həyata keçirilmiş təşəbbüsləri diqqətə çatdırıb. Bildirilib ki, dövlət qurumlarının, boya istehsalçılarının və beynəlxalq tərəfdaşların iştirakı ilə hazırlanmış müvafiq normativ sənəd layihəsi ÜST-nin və Qurğuşunlu Boyaların Ləğvi üzrə Qlobal Alyansın (Global Alliance to Eliminate Lead Paint) ekspertləri tərəfindən müsbət qiymətləndirilib.
BMT-nin Dayanıqlı İnkişaf Məqsədlərinə (DİM 3: Sağlam həyat və rifah, DİM 12: Məsuliyyətli istehlak və istehsal, eləcə də DİM 17: Məqsədlər naminə tərəfdaşlıq) uyğun olaraq həyata keçirilən bu fəaliyyətlər təhlükəli kimyəvi maddələrdən qaynaqlanan xəstəliklərin azaldılmasına və kimyəvi tullantıların ekoloji cəhətdən təhlükəsiz idarə olunmasına mühüm töhfə verir.
ÜST-nin Yol Xəritəsinin həyata keçirilməsinə dair ölkə təcrübələri icmalında Azərbaycan kimyəvi zəhərlənmələrin idarə edilməsi sahəsində ehtiyacların müəyyənləşdirilməsi və maarifləndirmə fəaliyyəti üzrə nümunə göstərilən ölkələr sırasında yer alıb.
ATU nümayəndəsinin beynəlxalq toplantıda iştirakı kimyəvi zəhərlənmələrin profilaktikası və tibbi xidmətin təkmilləşdirilməsi, habelə toksikologiya üzrə tədris və elmi-tədqiqat işlərinin inkişafı baxımından mühüm əhəmiyyət daşıyır.

