Bu gün dünyada görmə sağlamlığına diqqətin artırılması məqsədilə Ümumdünya Görmə Günü qeyd olunur.

Aztibb.az xəbər verir ki, Ümumdünya Səhiyyə Təşkilatının təşəbbüsü ilə oktyabr ayının ikinci cümə axşamı hər il Ümumdünya Görmə Günü kimi qeyd edilir. Bu əlamətdar gün korluq, görmənin pozulması və görmə qabiliyyətini itirmiş insanların reabilitasiyası ilə bağlı problemlərə diqqət çəkmək məqsədi daşıyır.

Görmə problemləri insanın gündəlik həyatına, təhsilinə, əmək fəaliyyətinə və sosial münasibətlərinə ciddi təsir göstərə bilər. Bu baxımdan göz sağlamlığının qorunmasında profilaktik tədbirlər və vaxtında tibbi müayinə mühüm əhəmiyyət daşıyır.

Mütəxəssislər görmədə bulanıqlıq, gözlərdə ağrı və ya qızartı, işığa həssaslıq, göz önündə ləkə və ya işıq çaxmaları, görmə sahəsində dəyişiklik kimi əlamətlərə laqeyd yanaşmamağı tövsiyə edirlər. Xüsusilə görmədə qəfil dəyişiklik yarandıqda vaxt itirmədən oftalmoloqa müraciət etmək vacibdir.

Ümumdünya Görmə Günü çərçivəsində göz xəstəliklərinin qarşısının alınması, erkən aşkarlanması və görmə qabiliyyətinin qorunması ilə bağlı maarifləndirmə və profilaktik tədbirlərin əhəmiyyəti bir daha diqqətə çatdırılır.

Göz sağlamlığının qorunması üçün mütəmadi oftalmoloji müayinələrdən keçmək, xroniki xəstəliklərə nəzarət etmək, gözləri zərərli amillərdən qorumaq və görmə ilə bağlı hər hansı dəyişiklik zamanı həkimə müraciət etmək mühüm addımlardır.