Kəlbəcərdə yaşayan sakinlərin, xüsusilə uşaqların sağlamlığının qorunması və zəruri müayinələrə əlçatanlığının təmin edilməsi məqsədilə səyyar tibbi xidmət təşkil olunub.

TƏBİB-dən Aztibb.az-a verilən məlumata görə, Milli İmmunlaşdırma Kampaniyası çərçivəsində ixtisaslı həkimlər 29 uşağı müayinə edib, onların peyvəndlənmə vəziyyətini qiymətləndiriblər. Müayinələrin nəticələrinə əsasən, uşaqlara yaşlarına uyğun zəruri peyvəndlər vurulub.

Səyyar xidmət zamanı valideynlərin müraciətləri dinlənilib, uşaqlar müvafiq müayinələrdən keçirilib, onların sağlamlığının qorunması ilə bağlı valideynlərə zəruri tövsiyələr verilib.

Səyyar xidmət uşaqlar arasında yoluxucu xəstəliklərin profilaktikasına və immunlaşdırma tədbirlərinin əhatə dairəsinin genişləndirilməsinə xidmət edir.