Avropada cinsi yolla ötürülən infeksiyaların (CYÖİ) sayı 2021-ci ildən sonra kəskin şəkildə artıb.

Aztibb.az "The Economist" jurnalına istinadən yazır ki, Avropa Xəstəliklərin Qarşısının Alınması və Nəzarəti Mərkəzinin (ECDC) məlumatlarına və ekspertlərin fikirlərinə görə, 2024-cü ildə mütəxəssislər Avropada təxminən 100 min qonoreya hadisəsi aşkarlayıblar. Bu, 2015-ci ilin göstəricisindən 3 dəfədən çox yüksəkdir. Sifilis hallarının sayı isə 2 dəfədən çox artaraq təxminən 46 minə çatıb.

Xlamidioz isə istisna təşkil edib. 2022-ci ildə ən yüksək göstəriciyə çatdıqdan sonra bu infeksiyanın aşkarlanma sayı azalıb və 2015-ci il səviyyəsinə enib.

Ümumdünya Səhiyyə Təşkilatının (ÜST) Avropa Regional Bürosunun cinsi yolla ötürülən infeksiyalar üzrə bölmə rəhbəri Stella Bivol bildirib: “İnfeksiyaların ötürülməsində real artım baş verir.”

Jurnalın məlumatına görə, bu dinamikanı yalnız müayinələrin sayının artması ilə izah etmək mümkün deyil. Bəzi mütəxəssislər artımı tanışlıq tətbiqlərinin geniş yayılması ilə əlaqələndirirlər. Niderlandlı həkim Henri de Vris isə qeyd edib ki, bu cür xidmətlər hazırkı xəstələnmə artımından xeyli əvvəl mövcud olub.

Digər mümkün səbəb prezervativlərdən istifadə tezliyinin azalması ola bilər. Bununla belə, nəşrin istinad etdiyi ÜST araşdırması yalnız bir yaş qrupunu əhatə edib.

Müəlliflər həmçinin HİV-in təmasdan əvvəl profilaktikasının (PrEP) təsirini də nəzərdən keçirirlər. Bu profilaktikanın bəzi kişilər, xüsusilə kişilərlə cinsi əlaqədə olan kişilər arasında prezervativ istifadəsinin azalmasına səbəb ola biləcəyi ehtimal edilir. Britaniyadakı cinsi sağlamlıq klinikasının apardığı araşdırma da belə bir əlaqəyə işarə edir.

Ekspertlər cinsi yolla ötürülən infeksiyaların yayılmasındakı artımın dəqiq səbəblərini müəyyənləşdirmək üçün araşdırmaları davam etdirirlər.